ନାରୀଙ୍କୁ ନ୍ୟାୟ ଦାବି କରି କଂଗ୍ରେସର ବିଧାନସଭା ଘେରାଉ କରିବା ବେଳେ ଲୋୟର ପିଏମଜିରେ ପୁଲିସ ଓ କଂଗ୍ରେସ କର୍ମୀ ମଧ୍ୟରେ ଖଣ୍ଡ ଯୁଦ୍ଧ ପରିସ୍ଥିତି ସୃଷ୍ଟି ହୋଇଛି।
ପୂର୍ବ ଯୋଜନା ମୁତାବକ ରାଜ୍ୟର ବିଭିନ୍ନ ଜିଲ୍ଲାରୁ ହଜାର ହଜାର କଂଗ୍ରେସ କର୍ମୀ ଓ ନେତା ସକାଳେ ରାମମନ୍ଦିର ନିକଟରେ ଏକାଠି ହୋଇଥିଲେ। ଆନ୍ଦୋଳନକୁ ଭଣ୍ଡୁର କରିବା ପାଇଁ କଂଗ୍ରେସ ନେତା ମାନସ ଚୌଧୁରୀ ଓ ଅନ୍ୟ ନେତାଙ୍କୁ ପୁଲିସ ଘରୁ ଉଠାଇ ନେଇଥିଲା।
ପରେ ସରକାର ବିରୋଧୀ ନାରା ଦେଇ ଏକ ପଟୁଆରରେ ବିଧାନସଭା ଅଭିମୁଖେ ବାହାରିଥିଲେ। ଲୋୟର ପିଏମଜିରେ ପହଞ୍ଚିବା ପରେ ପୁଲିସ ସେମାନଙ୍କୁ ଅଟକାଇବାକୁ ଚେଷ୍ଟା କରିଥିଲା। କିନ୍ତୁ କଂଗ୍ରେସ କର୍ମୀମାନେ ବ୍ୟାରିକେଡ଼ ଭାଙ୍ଗି ସିଧା ସଳଖ ବିଧାନସଭା ଅଭିମୁଖେ ଯାଇଥିଲେ। ପ୍ରଥମ ବ୍ୟାରିକେଡ଼ ଭାଙ୍ଗିବା ପରେ ପୁଲିସ ଲାଠି ମାଡ଼ କରିଥିଲେ।
ଏହାକୁ ପ୍ରତିହତ କରିବାକୁ ଯାଇ କଂଗ୍ରେସ କର୍ମୀମାନେ ଚେୟାରକୁ ପୁଲିସ ଉପରକୁ ଫିଙ୍ଗିଥିଲେ। ଏମିତିକି କିଛି ଢେଲା ଓ କାଚ ବୋତଲ ମାଡ଼ ହୋଇଥିଲା। ପରିସ୍ଥିତି ଅଣାୟତ୍ତ ହେବାରୁ ପୁଲିସ ଲୁହବୁହା ଗ୍ୟାସ ଛାଡିଥିଲା ଓ ପାଣି ମାଡ କରିଥିଲା। ଏଥିରେ ଅନେକ କଂଗ୍ରେସ କର୍ମୀଙ୍କ ମୁଣ୍ଡ ଫେରିଥିବା ବେଳେ ପୁଲିସ କର୍ମଚାରୀ ଓ ଅଧିକାରୀମାନେ ଆହତ ହୋଇଥିଲେ। ଦୀର୍ଘ ସମୟଧରି ଗାନ୍ଧୀ ମାର୍ଗରେ ଏଭଳି ପରିସ୍ଥିତି ଲାଗି ରହିଥିଲା।।
