ଗତକାଲି କଂଗ୍ରେସର ୧୨ ଜଣ ବିଧାୟକଙ୍କୁ ବିଧାନସଭାରେ ୭ ଦିନ ପାଇଁ ନିଲମ୍ବନ କରାଯିବା ପରେ ଆଜି ଅନ୍ୟ ଦୁଇ କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି ଓ ରମେଶ ଜେନା ଗୃହରେ ଘଣ୍ଟ ବାଡ଼େଇ ପ୍ରତିବାଦ କରିଛନ୍ତି। ବାହାରେ କଂଗ୍ରେସର ଅନ୍ୟ ବିଧାୟକଙ୍କ ସମେତ ଦଳୀୟ କର୍ମୀମାନେ ବ୍ୟାରିକେଡ ଭାଙ୍ଗି ରାସ୍ତାକୁ ଆସିଛନ୍ତି। ପୁଲିସ ସହ କଂଗ୍ରେସ କର୍ମୀମାନେ ଧସ୍ତାଧସ୍ତି ହୋଇଥିଲେ।
ଓଡ଼ିଶା ବିଧାନସଭାରୁ କଂଗ୍ରେସର ୧୨ ଜଣ ବିଧାୟକଙ୍କୁ ନିଲମ୍ବନ କରାଯିବା ପରେ ଗତକାଲି ଠାରୁ ପରିସ୍ଥିତି ଜଟିଳ ରହିଛି। ଗତକାଲି ବିଳମ୍ବିତ ରାତି ପର୍ଯ୍ୟନ୍ତ ବିଧାନସଭାରେ ଭିତରେ କଂଗ୍ରେସ କର୍ମୀମାନେ ପ୍ରତିବାଦ କରିଥିଲେ। ମାଷ୍ଟର କ୍ୟାଣ୍ଟିନ ରାସ୍ତାରେ ସାରାରାତି କଂଗ୍ରେସ ବିଧାୟକମାନେ ଧାରଣାରେ ବସି ପ୍ରତିବାଦ କରିଥିଲେ।
ଏମିତିକି ବିଧାନସଭାକୁ ପ୍ରବେଶ ପାଇଁ ଯାଉଥିବା ବିଧାୟକଙ୍କୁ ଜୋର୍ ଜବରଦସ୍ତ ସୁରକ୍ଷା କର୍ମୀଙ୍କ ଦ୍ବାରା ତଡ଼ି ଦିଆଯାଇଥିବା ଅଭିଯୋଗ ହୋଇଛି। ବିଧାୟକ ତାରା ପ୍ରସାଦ ବାହିନୀପତି ସାରା ରାତି ଧାରଣାସ୍ଥଳରେ ବସି ଅସୁସ୍ଥ ହୋଇପଡ଼ିଥିବାରୁ କ୍ୟାପିଟାଲ ହସ୍ପିଟାଲର ଡାକ୍ତର ତାଙ୍କ ସ୍ଵାସ୍ଥ୍ୟ ପରୀକ୍ଷା କରିଥିଲେ।
ମଧ୍ୟାହ୍ନ ବେଳକୁ ଶତାଧିକ କଂଗ୍ରେସ କର୍ମୀ ବିଧାନ ସଭା ଭିତରକୁ ପ୍ରବେଶ ପାଇଁ ଉଦ୍ୟମ କରିଥିବା ବେଳେ ପୋଲିସ ସହ ଧସ୍ତାଧସ୍ତି ପରିସ୍ଥିତି ସୃଷ୍ଟି ହୋଇଥିଲା।ଅପରପକ୍ଷେ ବିଧାୟକ ଶ୍ରୀ ବାହିନୀପତିଙ୍କ ଅଭିଯୋଗ ଅନୁଯାୟୀ ସୁରକ୍ଷା କର୍ମୀ ମାନେ ତାଙ୍କ ବେକରୁ ସୁନା ଚେନ ଛିଡାଇ ନେଇଛନ୍ତି।
ଏଭଳି ସ୍ଥିତିରେ ବିରୋଧୀ ବିଧାୟକମାନେ ସରକାରଙ୍କ ପଦକ୍ଷେପକୁ ନିନ୍ଦା କରିଥିବା ବେଳେ ସାଧାରଣ ଲୋକଙ୍କ ଗଣତାନ୍ତ୍ରିକ ଅଧିକାରକୁ ଛଡ଼ାଇ ନିଆଯାଉଛି ବୋଲି କହିଛନ୍ତି। ଏ ନେଇ କଂଗ୍ରେସର ବରିଷ୍ଠ ନେତା ନରସିଂହ ମିଶ୍ର ଏଵଂ ପ୍ରସାଦ ହରିଚନ୍ଦନ ଏକ ସାମ୍ବାଦିକ ସମ୍ମିଳନୀରେ ସରକାରଙ୍କ ନିଲମ୍ବନ ଆଦେଶକୁ ନିନ୍ଦା କରିଛନ୍ତି।
