ଜାନୁଆରୀ ୧୮ରେ ଶୁକ୍ର ଓ ଶନି ଗ୍ରହର ମିଳନ
୨୦୨୫ ମସିହା, ଜାନୁଆରୀ ଦ୍ବିତୀୟ ଅର୍ଦ୍ଧର ସବୁଦିନ ସଂଧ୍ୟା ଆକାଶରେ ୪ ଟି ଗ୍ରହକୁ ଖାଲି ଆଖିରେ ଦେଖିବା ପାଇଁ ଏକ ଉତ୍କୃଷ୍ଟ ସୁଯୋଗ ଆସିବ । ଏଥି ସହ ଆକାଶରେ ଖାଲି ଆଖିରେ ଦେଖାଯିବ ଶୁକ୍ର ଓ ଶନି ଗ୍ରହର ଦୌଡ, ମିଳନ ଓ ଶୁକ୍ର କୁ ଟପି ଶନି ଗ୍ରହ ଆଗକୁ ବଢିବାର ଅପୂର୍ବ ଦୃଶ୍ୟ ।
ବର୍ତ୍ତମାନ ଠାରୁ ଜାନୁଆରୀ ମାସ ସାରା ସୂର୍ଯ୍ୟାସ୍ତ ପରେ ଚାରୋଟି ଗ୍ରହ ଖାଲି ଆଖିରେ ଦେଖିହେବ । ଏବେ ପଶ୍ଚିମ ଦିଗବଳୟର କିଛି ଉପରେ ଦେଖାଯିବ ଉଜ୍ଜଳ ଶୁକ୍ର ଗ୍ରହ, ତାର କିଛ ଉପରକୁ ଇଷତ୍ ହଳଦି ରଙ୍ଗର ଶନି ଗ୍ରହ ଓ ପୂର୍ବ ଦିଗବଳୟରେ ମଙ୍ଗଳ ଗ୍ରହ ଓ କିଛି ଉପରେ ଥିବ ଉଜ୍ବଳ ବୃହଷ୍ପତି ଗ୍ରହ । ରାତି ବଢିବା ସଙ୍ଗେ ଏହି ଗ୍ରହ ଗୁଡିକ ପୂର୍ବରୁ ପଶ୍ଚିମ ଆଡକୁ ଗତି କରି କ୍ରମାନ୍ବୟରେ ଅସ୍ତ ହେବେ । ରାତି ୮.୩୦ଟା ବେଳକୁ ପ୍ରଥମେ ଶୁକ୍ର ଓ ଶନି ଗ୍ରହ ଅସ୍ତ ହେବ । ସବୁଠାରୁ ଆର୍କଷଣୀୟହେବ ଜାନୁଆରୀ ମାସ ୧୮ତାରିଖରେ ଶୁକ୍ର ଓ ଶନି ଗ୍ରହର ମିଳନ । ଏବେ ଶନି ଗ୍ରହ ଶୁକ୍ରର ବେସ୍ ଉପରେ ଦେଖାଯାଉଛି, ପରବର୍ତି ଦିନ ଗୁଡିକରେ ଗ୍ରହ ଦୁଇଟି ମଧ୍ୟରେ ଦୂରତା କମି କମି ୧୮ ତାରିଖ ସଂଧ୍ୟାରେ ପ୍ରୟ ୨ ଘଣ୍ଟା ଧରି ଶୁକ୍ର ଶନି ଗ୍ରହର ଖୁବ୍ ନିକଟରେ ଦେଖାଯିବ ଓ ପରେ ଶନି ତଳକୁ ତଳକୁ ଯାଇ ଶୁକ୍ର ଗ୍ରହ ଠାରୁ ଦୁରେଇ ଯିବ ।
ସୂର୍ଯ୍ୟ ଚାରିପଟେ ବୁଲୁଥିବା ୮ଟି ଗ୍ରହ ଭିତରୁ ୫ଟି ଗ୍ରହ ବୁଧ, ଶୁକ୍ର, ମଙ୍ଗଳ, ବୃହସ୍ପତି ଏବଂ ଶନି କୁ ଖାଲି ଆଖିରେ ଦେଖିହୁଏ । ସୂର୍ଯ୍ୟ ଚାରିପଟେ ଅଲଗା ଅଲଗା ବେଗରେ ବୁଲିବା ଫଳରେ କିଛି ଗ୍ରହ ଆକାଶରେ ଏକ ସମୟରେ ଦେଖାଯାନ୍ତି । ଏହାକୁ ଗ୍ରହ ସମାବେଶ ବା ଇଂରାଜୀ ରେ ‘ପ୍ଲାନେଟ୍ ପରେଡ’ କୁହାଯାଏ । ଆକାଶରେ ଏକ ସମୟରେ ତିନୋଟି ଗ୍ରହ ଦେଖାଯିବା ଏକ ଅତି ସାଧାରଣ ଘଟଣା । ପ୍ରତି ବର୍ଷ ଅନେକ ଥର କିଛି ଦିନ ଧରି ଏହା ଦେଖାଯାଏ | ସେହିଭଳି ଚାରୋଟି ଗ୍ରହ ବର୍ଷକୁ ଥରେ ଅଳ୍ପ ଦିନ ପାଇଁ ଏକା ସମୟରେ ଦେଖାଯାଏ । ପାଞ୍ଚଟି ଗ୍ରହ – ପ୍ରତି ୧୯ ବର୍ଷରେ ଥରେ ଏବଂ ସମସ୍ତ ଆଠଟି ଗ୍ରହ – ପ୍ରାୟ ଶହେ ସତୁରି ବର୍ଷରେ ଥରେ ଏକା ସମୟରେ ଦେଖାଯାଏ ।
ବିଶ୍ବ ସାରା ଆଗ୍ରହୀ ଜ୍ୟୋତିର୍ବିଜ୍ଞାନୀ ମାନେ ନିଜ ନିଜର ଦୂରବୀକ୍ଷଣ ଧରି ଏହି ମହାକାଶୀୟ ଉତ୍ସବ ଦେଖିବା ପାଇଁ ଓ ଜନସାଧାରଣଙ୍କୁ ଦେଖାଇବା ପାଇଁ ପ୍ରସ୍ତୁତ ହେଲେଣି । ଏଭଳି ଏକ ସୁଯୋଗ ବିଶେଷକରି ଛାତ୍ରୀ- ଛାତ୍ର ମାନେ ହାତଛଡା କରନ୍ତୁ ନାହିଁ । ଏହି ସୁନ୍ଦର ମହାଜାଗତିକ ଘଟଣା ମେଘମୁକ୍ତ ଥିବା ଭାରତ ତଥା ଓଡିଶାର ସବୁ ଅଞ୍ଚଳରୁ ଖାଲି ଆଖିରେ ଦେଖିହେବ ଓ ଏହାର କୌଣସି ପ୍ରଭାବ କାହା ଉପରେ ପଡିବାର ନାହିଁ ବୋଲି କହିଛନ୍ତି ଜନ ବିଜ୍ଞାନୀ ତଥା ପଠାଣି ସାମନ୍ତ ପ୍ଲାନେଟାରିୟମର ପୂର୍ବତନ ନିର୍ଦ୍ଦେଶକ ଡ: ଶୁଭେନ୍ଦୁ ପଟ୍ଟନାୟକ।
