ତେଲେଙ୍ଗାନା ରାଜ୍ୟର ସୂର୍ଯ୍ୟପେଟା-ଖମାମ ରାସ୍ତାରେ ମର୍ମନ୍ତୁଦ ସଡ଼କ ଦୁର୍ଘଟଣା ଘଟି ୪ ଓଡ଼ିଆ ମୃତ୍ୟୁ ଘଟିଛି। ମୃତକଙ୍କ ଭିତରେ ବସ୍ ଡ୍ରାଇଭର ସମେତ ୩ ଜଣ ଶ୍ରମିକ ଅଛନ୍ତି। ମୃତ ଶ୍ରମିକଙ୍କ ମଧ୍ୟରେ ଦୁଇଜଣ ମହିଳା ଥିବା ଜଣା ପଡ଼ିଛି। ଏଥିରେ ବସିଥିବା ଅନ୍ୟ ଶ୍ରମିକମାନେ ମଧ୍ୟ ଆହତ ହୋଇଛନ୍ତି। ସେମାନଙ୍କୁ ନିକଟସ୍ଥ ହସ୍ପିଟାଲରେ ଚିକିତ୍ସା କରାଯାଉଛି। ମିଳିଥିବା ସୂଚନା ଅନୁଯାୟୀ ନୂଆପଡ଼ାରୁ ୩୨ ଜଣ ଶ୍ରମିକ ବସରେ ହାଇଦ୍ରାବାଦରୁ ଛତିଶଗଡ ଯାଉଥିଲେ। ବାଟରେ ରଖାଯାଇଥିବା ଏକ ଟ୍ରକ୍ କୁ ଦେଖି ନ ପାରି ବସ୍ ଡ୍ରାଇଭର ସେଥିରେ ଗାଡ଼ି ପିଟି ଦେଇଥିଲା। ଘଟଣାସ୍ଥଳରେ ଶ୍ରମିକମାନଙ୍କ ମୃତ୍ୟୁ ଘଟିଥିବା କୁହାଯାଉଛି। ଦୁର୍ଘଟଣା ପରେ ତେଲେଙ୍ଗାନା ପୁଲିସ ପହଞ୍ଚି ମୃତଦେହକୁ ବ୍ୟବଚ୍ଛେଦ ପାଇଁ ପଠାଇଛି ଏବଂ ସେମାନଙ୍କ ପରିବାରକୁ ସୂଚନା ଦେଇଛି। ଆହତଙ୍କ ମଧ୍ୟରେ ଅନେକଙ୍କ ଅବସ୍ଥା ଏବେ ବି ସଙ୍କଟାପନ୍ନ ରହିଛି।