ଦିନସାରା ଫାର୍ମ ହାଉସରେ କାମ ସାରି ସୋଇଥିଲେ। ନିଘୋଡ଼ ନିଦରେ ଶୋଇଥିବା ବେଳେ ଶୁଭିଲା ପ୍ରଚଣ୍ଡ ଶବ୍ଦ। କିଛି ଭାବିବା ପୂର୍ବରୁ ଶିକାରୀଙ୍କ ବନ୍ଧୁକରୁ ଗୁଳି ଆସି ବାଜିଥିଲା ଫାର୍ମ ହାଉସ୍ ମାଲିକଙ୍କ କାନମୁଣ୍ଡରେ। ମାତ୍ର କିଛି ସମୟ ମଧ୍ୟରେ ଉଡିଗଲା ପ୍ରାଣ ବାୟୁ।

ଏଭଳି ଏକ ଅଘଟଣ ଦେଖିବାକୁ ମିଳିଛି ଢେଙ୍କାନାଳ ଭାପୁର ଅଞ୍ଚଳରେ। ମୃତକ ହେଲେ ଫାର୍ମ ହାଉସ୍ ମାଲିକ ଗୋବିନ୍ଦ ନାୟକ। ଖବର ନେବାରୁ ଜଣାପଡ଼ିଛି ଯେ, ଢେଙ୍କାନାଳ ଜିଲ୍ଲା ଭାପୁର ଫାଶୀ ଗ୍ରାମରେ ଥିବା ଫାର୍ମ ହାଉସରେ ଗୋବିନ୍ଦ ଶୋଇଥିବା ବେଳେ ବିଳମ୍ୱିତ ରାତିରେ ଏହି ଗୁଳିକାଣ୍ଡ ଘଟିଛି। ଜଣେ ଶିକାରୀଙ୍କ ଗୁଳିରେ ଫାର୍ମ ହାଉସ ମାଲିକ ଗୁରୁତର ଆହତ ହୋଇଥିଲେ। ତାଙ୍କୁ ଢେଙ୍କାନାଳ ହସପିଟାଲରେ ଚିକିତ୍ସା ନିମନ୍ତେ ଭର୍ତ୍ତି କରାଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି। ଘଟଣାସ୍ଥଳରେ ଢେଙ୍କାନାଳ ସଦର ଥାନା ପୁଲିସ ପହଞ୍ଚି ଘଟଣାର ତଦନ୍ତ କରିଥିବା ବେଳେ ମୃତଦେହକୁ ବ୍ୟବଚ୍ଛେଦ ପାଇଁ ପଠାଇଛି। ଏହି ଘଟଣାରେ ପୁଲିସ ଜଣେ ଶିକାରୀଙ୍କୁ ଅଟକ ରଖିଛି। ତେବେ କାହିଁକି ସେ ଗୁଳି କରିଥିଲେ ତା’ର କାରଣ ନେଇ କିଛି ଜଣା ପଡିନାହିଁ।

ଢେଙ୍କାନାଳ ଜିଲ୍ଲା ସଦର ଥାନା ଚାଉଳଆ ଖମାର ଗ୍ରାମର ଏକ ବନ୍ଦ ଘରୁ ୩ଟି ଝୁଲନ୍ତା ମୃତଦେହ ଉଦ୍ଧାର କରାଯାଇଛି। ମୃତକମାନେ ଗୋଟିଏ ପରିବାରର ବୋଲି ଜଣାପଡ଼ିଛି।

ମୃତକମାନେ ହେଲେ ଶଙ୍କର୍ଷଣ ଦାସ, ସୁବର୍ଣ୍ଣ ଦାସ ଓ ସନ୍ତୋଷ ଦାସ। ତିନିଜଣ ସମ୍ପର୍କରେ ବାପା, ଝିଅ ଓ ନାତି। ଘଟଣାସ୍ଥଳରୁ ପୋଲିସ ଏକ ମିନି ଡାଏରୀ ଜବତ କରିଛି ପୁଲିସ। ବନ୍ଦ ଘର ବାହାରେ ବୃଦ୍ଧ ଜେଜେ ମାଆ ଥିବା ଜଣା ପଡିଛି। ଏମିତି ଗୋଟିଏ ପରିବାରର ୩ ଜଣଙ୍କ ମୃତ୍ୟୁକୁ ନେଇ ପୁଲିସ ତଦନ୍ତ କରୁଥିବା ବେଳେ ଏହା ହତ୍ୟା ନା ଆତ୍ମହତ୍ୟା ତାହା ଜଣା ପଡିନାହିଁ। ଘଟଣାସ୍ଥଳରୁ ମୃତଦେହ ୩ ଟି ଉଦ୍ଧାର କରାଯାଇଥିବା ବେଳେ ସାଇଣ୍ଟଫିକ୍ ଟିମ୍ ଘଟଣାସ୍ଥଳରେ ପହଞ୍ଚି ନମୁନା ସଂଗ୍ରହ କରିଛନ୍ତି। ଏନେଇ ପୁଲିସ ସ୍ଥାନୀୟ ଲୋକଙ୍କୁ ପଚରାଉଚରା କରୁଥିଲେ ମଧ୍ୟ ଏଯାଏଁ ମୃତ୍ୟୁର କାରଣ ଜାଣି ପାରିନି। ପାରିବାରିକ କଲହରୁ ଏହି ଆତ୍ମହତ୍ୟା ଘଟିଥାଇ ପାରେ ବୋଲି ଅନୁମାନ କରାଯାଉଛି।