ଗୁରୁବାର ଦୁବାଇଠାରେ ଅନୁଷ୍ଠିତ ଭାରତ-ବାଂଲାଦେଶ ଦିନିକିଆ ମ୍ୟାଚରେ ଭାରତ ବାଂଲାଦେଶକୁ ୬ ୱିକେଟରେ ହରାଇଛି। ଏହି ମ୍ୟାଚରେ ବାଂଲାଦେଶ ପ୍ରଥମେ ବ୍ୟାଟିଂ କରି ଭାରତ ପାଇଁ ୨୨୯ ରନର ବିଜୟ ଲକ୍ଷ୍ୟ ରଖିଥିଲା। ଜବାବରେ ଭାରତ ୪୬.୩ ଓଭରରେ ୨୩୧ ରନ କରି ବାଂଲାଦେଶ ପରାସ୍ତ କରି ତା’ର ଆଇସିସି ଚାମ୍ପିୟନ୍ସ ଟ୍ରଫି ପାଇଁ ବିଜୟ ଅଭିଯାନ ଆରମ୍ଭ କରିଛି।
ଭରତୀୟଦଳର ଶୁଭମନ ଗିଲଙ୍କ ୧୨୯ ବଲରେ ୧୦୧ ରନ କରିଥିବା ବେଳେ ଅଧିନାୟକ ରୋହିତ ଶର୍ମା ଓ କେଏଲ ରାହୁଲ ୪୧ ରନ ଲେଖାଏଁ କରିଛନ୍ତି। ସେହିଭଳି ବିରାଟ କୋହଲି ୨୨ ରନ କରିଥିଲେ। ଆରମ୍ଭରୁ ବାଂଲାଦେଶ ଦଳ ବ୍ୟାଟିଂ କରି ମାତ୍ର ୩୫ ରନରେ ୫ ଟି ଓ୍ବିକେଟ ହରାଇଥିଲା। ଏହି ମ୍ୟାଚରେ ବାଂଲାଦେଶ ପକ୍ଷରୁ ଟାଞ୍ଜିଦ ହୁସେନ ଓ ସୌମ୍ୟ ସରକାର ବ୍ୟାଟିଂ ଆରମ୍ଭ କରିଥିଲେ। ସରକାର କିଛି ରନ୍ କରିବା ଆଗରୁ ମହମ୍ମଦ ସମ୍ମି ତାଙ୍କୁ ଆଉଟ୍ କରିଦେଇଥିଲେ। ସେହିଭଳି ବାଂଲାଦେଶ ଟିମର ନଜମଲ ହୁସେନ ସାଣ୍ଟୋ କିଛି ସଂଗ୍ରହ କରିବା ଆଗରୁ ହର୍ଷିତ ରାଣାଙ୍କ ବଲରେ ଆଉଟ୍ ହୋଇଯାଇଥିଲେ। ସେହିପରି ମେହେଦି ହାସାନ ମିରାଜ ମାତ୍ର ୫ ରନ କରି ଆଉଟ୍ ହୋଇଯାଇଥିବା ବେଳେ ତେବେ ତାଞ୍ଜିଦ ୨୫ ରନ କରି ଆଉଟ ହୋଇଥିଲେ। ତେବେ ତାଓ୍ବିଦ ହ୍ରିଦୟ ଓ ଜାକର ଅଲ୍ଲି ଲଢୁଆ ବ୍ୟାଟିଂ କରି ସ୍ଥିତିକୁ ସମ୍ଭାଳିଥିଲେ। ହ୍ରିଦୟ ଏକ ଲଢୁଆ ଶତକ ଅର୍ଜନ କରିଥିବାବେଳେ ଜାକର ୬୮ ରନ କରିଥିଲେ। ତେବେ ଦଳ ୨୨୮ ରନ କରି ଅଲଆଉଟ ହୋଇଯାଇଥିଲା। ଭାରତ ପକ୍ଷରୁ ମହମ୍ମଦ ସମ୍ମି ୫ଟି ୱିକେଟ ନେଇଥିବାବେଳେ ହର୍ଷିତ ରାଣା ୩ଟି ଓ ଅକ୍ଷର ପଟେଲ ୨ଟି ୱିକେଟ ନେଇଥିଲେ ।
