ଖବର ନେବାରୁ ଜଣାପଡ଼ିଛି ଯେ, କିଟ୍‌ରେ ପଡଢ଼ୁଥିବା ଜଣେ ନେପାଳୀ ଛାତ୍ରୀ ଗତକାଲି ବିଳମ୍ବିତ ରାତିରେ ହଷ୍ଟେଲ ଭିତରେ ଆତ୍ମହତ୍ୟା କରିଥିଲେ। ଆଜି ସକାଳୁ ଛାତ୍ରୀଙ୍କୁ ମୃତଦେହ ମିଳିବା ପରେ କ୍ୟାମ୍ପସ୍‌ ଭିତରେ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହୋଇଥିଲା। ନେପାଳୀ ଛାତ୍ରଛାତ୍ରୀମାନେ କ୍ୟାମ୍ପସ୍‌ ଭିତରେ ଭଙ୍ଗାରୁଜା କରିବା ସହ ହୋ-ହଲ୍ଲା କରିଥିଲେ। ଏପରିସ୍ଥଳେ ପୁଲିସ ପହଞ୍ଚି ଘଟଣାର ତଦନ୍ତ କରିଥିଲା। ପ୍ରାଥମିକ ସୂଚନା ଅନୁଯାୟୀ ପ୍ରେମରେ ପ୍ରତାରଣା ପାଇଁ ଛାତ୍ରୀ ଆତ୍ମହତ୍ୟା କରିଥିବା ଜଣାପଡ଼ିଥିଲା। ପୁଲିସ ଉତ୍ତର ପ୍ରଦେଶ ଲକ୍ଷ୍ନୌର ଜଣେ ଛାତ୍ରଙ୍କୁ ମଧ୍ୟ ଗିରଫ କରିଛି।
ସେପଟେ ବିଶ୍ୱବିଦ୍ୟାଳୟରେ ପରିସ୍ଥିତିକୁ ଦେଖି ସାଇନ୍‌-ଏ-ଡାଏ ଘୋଷଣା କରାଯାଇଥିଲା। ନେପାଳର ଛାତ୍ରଛାତ୍ରୀଙ୍କୁ କ୍ୟାମ୍ପସ୍‌ ଛାଡ଼ିବା ପାଇଁ ନୋଟିସ୍‌ କରାଯାଇଥିଲା। ଛାତ୍ରଛାତ୍ରୀମାନଙ୍କୁ ବସ୍‌ରେ କଟକ ରେଳ ଷ୍ଟେସନ୍‌ରେ ଛାଡ଼ି ଦିଆଯାଇଥିଲା। ସେଠାରୁ ରିଜର୍ଭେସନ ଟିକଟ ନ ମିଳିବାରୁ ସେମାନେ ଜେନେରାଲ୍‌ ବଗିରେ ପୁରୀ-ପାଟଣା ଏକ୍ସପ୍ରେସ୍‌ରେ ଯାଇଥିଲେ। କିନ୍ତୁ ପରବର୍ତ୍ତୀ ସମୟରେ ନେପାଳର ପ୍ରଧାନମନ୍ତ୍ରୀ ଏଥିରେ ହସ୍ତକ୍ଷେପ କରିଛନ୍ତି। ଛାତ୍ରଛାତ୍ରୀଙ୍କୁ କାହିଁକି କ୍ୟାମ୍ପସ୍‌ରୁ ଫେରାଇ ଦିଆଗଲା ସେ ନେଇ ପଚାରି ବୁଝିଛନ୍ତି। ଖୁବ୍‌ ଶିଘ୍ର ଦୁଇଜଣ ଅଧିକାରୀଙ୍କୁ ନେପାଳ ପ୍ରଧାନମନ୍ତ୍ରୀ ପଠାଇବାର ବ୍ୟବସ୍ଥା କରୁଛନ୍ତି ବୋଲି କହିଛନ୍ତି। ଏହା ପରେ ଏବେ ପୁଣିଥରେ ନଇଁଛି କିଟ୍‌ କର୍ତ୍ତୃପକ୍ଷ। ଛାତ୍ରଛାତ୍ରୀଙ୍କୁ କ୍ୟାମ୍ପସ୍‌କୁ ଫେରି ଆସିବା ପାଇଁ ଅପିଲ କରିଛନ୍ତି ବିଶ୍ୱବିଦ୍ୟାଳୟ କୂଳପତି।