ଭୁବନେଶ୍ବରରେ ଉତ୍ପାତ କଲେଣି ଲୁଟେରା। ଶୁକ୍ରବାର ଦିନ ଦ୍ଵି ପ୍ରହରରେ ସ୍ପଷ୍ଟ ଦିବାଲୋକରେ ଝାମ୍ପିନେଲେ ଦୁଇ ଲକ୍ଷ ୫୫ ହଜାର ଟଙ୍କା। କିଛି ଭାବିବା ଆଗରୁ ହାତରୁ ଚାଲିଗଲା ଝାଳବୁହା ରୋଜଗାର। ଏଭଳି ଦେଖିବାକୁ ମିଳିଛି ଇନ୍ଫୋସିଟି ଅଞ୍ଚଳରେ। ଇନ୍ଫୋସିଟି ଥାନା ଅନ୍ତର୍ଗତ ଖୋଦ୍ ଇନ୍ଫୋସିସ୍ କ୍ୟାମ୍ପସ ଭିତରୁ ଲୁଟେରାମାନେ ଏଭଳି ଲୁଟ କରିଛନ୍ତି।

ଖବର ନେବାରୁ ଜଣାପଡ଼ିଛି ଯେ ଏକ ସିକ୍ୟୁରିଟ ସଂସ୍ଥାର ମୁଖ୍ୟ ଶିଶିର କୁମାର ମହାପାତ୍ର ପୁଅର ନାମ ଲେଖା ଓ ଘର କାମ ପାଇଁ ବ୍ୟାଙ୍କରୁ ଟଙ୍କା ଉଠାଇ ଅଫିସକୁ ଆଣୁଥିବା ସମୟରେ ଦୁଇ ଜଣ ଯୁବକ ଏକ କଳା ପଲ୍ସରରେ ତାଙ୍କୁ ପିଛା କରୁଥିଲେ। ସେ କ୍ୟାମ୍ପସ ଭିତରେ ବାଇକ୍ ରଖି ଅଫିସ ଭିତରକୁ ଯିବା ପୂର୍ବରୁ ଲୁଟେରାମାନେ ତାଙ୍କ ହାତରୁ ବ୍ୟାଗ୍ ନେଇ ଆଖି ପିଛୁଳାକେ ଚମ୍ପଟ ମାରିଥିଲେ। ଲୁଟର ଶିକାର ହୋଇଥିବା ଶିଶିର ଥାନାରେ ଅଭିଯୋଗ କରିବା ପରେ ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରୁଛି। କିନ୍ତୁ ଏ ପର୍ଯ୍ୟନ୍ତ ଲୁଟରାଙ୍କ ସମ୍ପର୍କରେ କୌଣସି ସୂଚନା ପାଇ ପାରିନାହିଁ।
ପ୍ରକାଶ ଥାଉ କି ଗତ କିଛି ଦିନ ଭିତରେ ସୁରକ୍ଷା ବଳୟରେ ଥିବା ଭୁବନେଶ୍ବରରୁ ଲୁଟେରାମାନେ ଗୋଟାକ ପରେ ଗୋଟାଏ ଲୁଟପାଟ କରି ଚାଲିଛନ୍ତି। କିଛି ଦିନ ଭିତରେ କଂଗ୍ରେସ ନେତା ନିରଞ୍ଜନ ପଟ୍ଟନାୟକଙ୍କ ଘରେ ପଶି ଗହଣା ଓ ଟଙ୍କା ଲୁଟି ନେଇଥିବା ବେଳେ ଦ୍ଵିତୀୟ ଥର ତାଙ୍କ ଘରେ ପଶିବାକୁ ଉଦ୍ୟମ ମାରିଥିଲେ। ସେହିଭଳି କଂଗ୍ରେସ ନେତା ଜୟଦେବ ଜେନାଙ୍କୁ ମଧ୍ୟ ଟଙ୍କା ଦାବି କରି ହତ୍ୟା ଧମକ ଦେଇଛନ୍ତି ଲୁଟେରା।