କେନ୍ଦ୍ର ସରକାର ପାକିସ୍ତାନ ସହିତ ଅସ୍ତ୍ରବିରତି ପାଇଁ ରାଜି ହେବା ନିଷ୍ପତ୍ତି ଉପରେ ପ୍ରଶ୍ନ ଉଠାଇଛନ୍ତି ଜନ ସୁରାଜ ପାର୍ଟିର ପ୍ରତିଷ୍ଠାତା ପ୍ରଶାନ୍ତ କିଶୋର(ପିକେ)। ସେ ପ୍ରଶ୍ନ କରିଛନ୍ତି, ଯଦି ଇସଲାମାବାଦ ପଛକୁ ହଟିଯାଉଥିଲା ତେବେ ସରକାର ଅସ୍ତ୍ରବିରତିକୁ କାହିଁକି ଗ୍ରହଣ କଲେ।
ବୈଦେଶିକ ମନ୍ତ୍ରୀ ଏସ ଜୟଶଙ୍କରଙ୍କ ବିବୃତିକ଼ୁ ଆଧାର କରି ପିକେ କହିଛନ୍ତି ଯେ, ବୈଦେଶିକ ମନ୍ତ୍ରୀ ନିଜେ ନିଶ୍ଚିତ କରିଛନ୍ତି, ପାକିସ୍ତାନର ଅନୁରୋଧରେ ଅସ୍ତ୍ରବିରତି ଆରମ୍ଭ ହୋଇଥିଲା। ଅପରପକ୍ଷେ ସିନ୍ଦୂର ଫରୁଆ ବଣ୍ଟନ ଅଭିଯାନକୁ କଟ୍ଟୁ ସମାଲୋଚନା କରିଛନ୍ତି ସେ।
ପିକେ ଆହୁରି କହିଛନ୍ତି ଯେ, ଭାରତ ସଂଘର୍ଷରେ ଏକ ଦୃଢ଼ ସ୍ଥିତିରେ ଥିଲା ଏବଂ ପାକିସ୍ତାନ ଏହାକୁ ବନ୍ଦ କରିବାକୁ ଚାହୁଁଥିଲା। ସେ ଏହା ମଧ୍ୟ କହିଛନ୍ତି, ଭାରତ ଏତେ ଶୀଘ୍ର ଅସ୍ତ୍ରବିରତି ପାଇଁ ରାଜି ହେବା ପରିବର୍ତ୍ତେ ପାକିସ୍ତାନ ବିରୁଦ୍ଧରେ ଆଉ ଦୁଇ ଦିନ ପାଇଁ କାର୍ଯ୍ୟାନୁଷ୍ଠାନ ଜାରି ରଖିପାରିଥାନ୍ତା।
ବିହାରର ପୂର୍ବ ଚମ୍ପାରଣରେ ଭାଷଣ ଦେଇ ସେ ଆହୁରି କହିଛନ୍ତି, ଦେଶର ବୈଦେଶିକ ମନ୍ତ୍ରୀ ଜଣେ ବହୁତ ଶିକ୍ଷିତ ଏବଂ ବୁଦ୍ଧିମାନ ବ୍ୟକ୍ତି। ମୁଁ ତାଙ୍କର ଏକ ବିବୃତି ପଢ଼ିଲି ଯେ, ପାକିସ୍ତାନର ଉଦ୍ୟମରେ ଅସ୍ତ୍ରବିରତି କରାଯାଇଥିଲା। ତେଣୁ, ଯଦି ପାକିସ୍ତାନ ଅସ୍ତ୍ରବିରତି ଚାହୁଁଥିଲା, ତେବେ ଏହାର ଅର୍ଥ ହେଉଛି ଯେ, ସେନା ଠିକ୍ କହୁଥିଲା ଆମେ ସେମାନଙ୍କୁ ପରାସ୍ତ କରୁଛୁ। ତେବେ ଭାରତ ଏଥିରେ କାହିଁକି ରାଜି ହେଲେ ବୋଲି ପ୍ରଶ୍ନ କରିଛନ୍ତି ପିକେ।
ସେ ଆହୁରି କରିଛନ୍ତି, ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ଉଭୟଙ୍କ ମଧ୍ୟରେ ଯୁଦ୍ଧବିରତି ପାଇଁ ଶ୍ରେୟ ନେଉଛନ୍ତି ଏବଂ ହୁଏତ ସେ ଶାନ୍ତି ପୁରସ୍କାର ଆଶା କରୁଛନ୍ତି। ତେବେ ଆମେ ଆମର ବୈଦେଶିକ ମନ୍ତ୍ରୀଙ୍କୁ ବିଶ୍ୱାସ କରିପାରୁ। ଟ୍ରମ୍ପ୍ଙ୍କୁ କାହିଁକି ବିଶ୍ୱାସ କରିବୁ ବୋଲି କହିଛନ୍ତି ସେ। ଏପରି ପରିସ୍ଥିତିରେ ଭାରତୀୟ ସେନାକୁ ନିଜର ଅପରେସନ୍ ଜାରି ରଖିବାକୁ ଏବଂ ପାକିସ୍ତାନକୁ ଉଚିତ୍ ଶିକ୍ଷା ଦେବାକୁ ଅନୁମତି ଦିଆଯିବା ଉଚିତ୍ ଥିଲା।
ଅଭିଯୋଗ କରି କହିଛନ୍ତି, ସରକାର ଅସ୍ତ୍ରବିରତି ପାଇଁ ରାଜି ହୋଇଥିଲେ। ଏବେ ସିନ୍ଦୂର ଫରୁଆ ବାଣ୍ଟିବା ଦ୍ୱାରା ଆଉ କୌଣସି ଫରକ ପଡ଼ିବ ନାହିଁ। ଏପରିସ୍ଥଳେ ଆଉ କାହିଁକି ଲୋକମାନଙ୍କୁ ବୋକା ବନାଉଛ। ସରକାର ଯାହା କହୁଛନ୍ତି ତାହା ଭୁଲ୍ ବୋଲି ପ୍ରଶାନ୍ତ କିଶୋର କହିଛନ୍ତି।
