ଭୁବନେଶ୍ୱର: କ୍ଷମତାରୁ ଯିବା ପରେ ନବୀନଙ୍କ ନୂଆ ଫଣ୍ଡା । ଜିତୁଛନ୍ତି ଲୋକଙ୍କ ହୃଦୟ । ବିଜେଡି ସରକାରରେ ଥିବା ବେଳେ ନବୀନ ମୁଖ୍ୟମନ୍ତ୍ରୀ ଥିବାବେଳେ କେବେ ବି ଜୀବନ ହାରିଥିବା ଚାଷୀଙ୍କୁ ଭେଟି ନଥିଲେ । ଏପରିକି ନବୀନଙ୍କ ନେତୃତ୍ୱାଧୀନ ବିଜେଡି ସରକାର ଚାଷୀ ଆତ୍ମହତ୍ୟାକୁ ଅସ୍ୱୀକାର କରି ଆସୁଥିଲା । କିନ୍ତୁ ବିଜେଡି କ୍ଷମତାରୁ ଯିବା ପରେ ସ୍ଥିତି ବଦଳିଛି ।

ମୁଖ୍ୟମନ୍ତ୍ରୀ ଥିବା ବେଳେ ହେଲିକପ୍ଟରରେ ଭୁବନେଶ୍ୱରରୁ କଟକ ଯାଉଥିବା ନବୀନ ପଟ୍ଟନାୟକ ଏବେ ଜିଲ୍ଲା ବୁଲି ଅଦିନିଆ ଫସଲ କ୍ଷୟକ୍ଷତି ଦେଖୁଛନ୍ତି । ମୃତ ଚାଷୀଙ୍କ ପରିବାରକୁ ଭେଟି ସମବେଦନା ଜଣାଇଛନ୍ତି ବିରୋଧୀ ଦଳ ନେତା ନବୀନ ପଟ୍ଟନାୟକ । କାଲି ନବୀନ ପଟ୍ଟନାୟକ ଗଞ୍ଜାମ ଜିଲ୍ଲା ଯାଇ ହିଞ୍ଜିଳିକାଟୁ ଓ ବିଭିନ୍ନ ସ୍ଥାନରେ ଫସଲ କ୍ଷୟକ୍ଷତି ଦେଖି ଚାଷୀଙ୍କୁ ଭେଟିଥିଲେ ।

ଆଜି ବିରୋଧୀ ଦଳ ନେତା ନବୀନ ପଟ୍ଟନାୟକ ଜଗତସିଂହପୁର ଜିଲ୍ଲା ଗସ୍ତ ବେଳେ ମୃତ ଚାଷୀଙ୍କ ପରିବାର ଲୋକଙ୍କୁ ଭେଟିଛନ୍ତି । ବାଲିକୁଦା ବ୍ଲକ ରିତିସିଂଘା ଗାଁକୁ ଯାଇ ମୃତ ଚାଷୀଙ୍କ ପରିବାରକୁ ଭେଟିଛନ୍ତି ନବୀନ ପଟ୍ଟନାୟକ । ପରିବାରକୁ ସମବେଦନା ଜଣାଇବା ସହ ସ୍ଥିତିକୁ ସରକାରଙ୍କୁ ଜଣାଇବେ ବୋଲି କହିଛନ୍ତି ନବୀନ ।

ବିରୋଧୀ ଦଳକୁ ବିଜେଡି ଯିବା ଆଉ ନବୀନ ବିରୋଧୀ ଦଳ ନେତା ହେବା ପରେ ନବୀନଙ୍କ ଏ ପରିବର୍ତ୍ତନ ଦେଖିବାକୁ ମିଳିଛି । କାରଣ ୨୪ ବର୍ଷ ଧରି ନବୀନ ମୁଖ୍ୟମନ୍ତ୍ରୀ ଥିବାବେଳେ କେବେ ବି ତାଙ୍କୁ ଏଭଳି ଭାବେ ଦେଖିବାକୁ ମିଳି ନଥିଲା । ଏବେ ବିରୋଧୀ ଦଳରେ ବସିବାର ପ୍ରାୟ ୬ ମାସ ପରେ ନବୀନ ଲୋକଙ୍କ ପାଖକୁ ଯାଇ ଲୋକଙ୍କୁ ଭେଟି ମୋହନ ସରକାରକୁ ଚେକ୍ ଦେଇଛନ୍ତି ।