ବାଘୁଣୀକୁ ଆଲିପୁର କାହିଁକି ନେଲ ବୋଲି ପ୍ରଶ୍ନ କଲେ NTCA
ଭୁବନେଶ୍ୱର, ୩୨/୧୨(ଓଡ଼ିଶା ଜାଗରଣ)
ପଶ୍ଚିମବଙ୍ଗର ପୁରୁଲିଆ ନିକଟ ବାଙ୍କୁଡ଼ାରେ ଟ୍ରାଙ୍କୁଲାଇଜ୍ କରି ଧରାଯାଇଥିବା ବାଘୁଣୀ ‘ଜିନତ୍’କୁ ତୁତନ୍ତ ଶିମିଳିପାଳରେ ଛାଡ଼ିବା ପାଇଁ ଏନଟିସିଏ (ଜାତୀୟ ବ୍ୟାଘ୍ର ସଂରକ୍ଷଣ କର୍ତ୍ତୃପକ୍ଷ) ନିର୍ଦ୍ଦେଶ ଦେଇଛନ୍ତି। ପ୍ରକାଶ ଥାଉ କି ଶିମିଳିପାଳରେ ବାଘ ବଂଶ ବିସ୍ତାର ପାଇଁ ମହାରାଷ୍ଟ୍ରରୁ ଜିନତକୁ ଅଣାଯାଇଥିଲା। କିନ୍ତୁ ଜୀନତ୍ ଶିମିଳିପାଳରେ ନ ରହି ପ୍ରଥମେ ଛତିଶଗଡ ଓ ପରେ ପଶ୍ଚିମବଙ୍ଗ ଜଙ୍ଗଲକୁ ଚାଲି ଯାଇଥିଲା। ତାକୁ ଟ୍ରାଙ୍କୁଲାଇଜ୍ କରିବା ପାଇଁ ୩ଟି ସଟ୍ ମରାଯାଇଥିଲା। ଯାହାର ପ୍ରଭାବରେ ଜୀନତ୍ ଅସୁସ୍ଥ ହୋଇପଡ଼ିଛି। ଅଲିପୁର ଚିଡ଼ିଆଖାନାରେ ୧୨ ଜଣିଆ ଟିମ୍ ଜୀନତ୍ର ଚିକିତ୍ସା ଓ ନିରୀକ୍ଷଣ ଦାୟିତ୍ବରେ ଅଛନ୍ତି। ସୋମବାର ସକାଳେ ବାଘୁଣୀର ଶ୍ବାସକ୍ରିୟା ଅସ୍ବାଭାବିକ ହୋଇ ପଡ଼ିଥିଲା। ତେବେ ଅପରାହ୍ଣ ୨ଟା ପରେ ସେ ସାଧାରଣ ଅବସ୍ଥାକୁ ଫେରିଛି। ହେଲେ ଶରୀର ସମ୍ପୂର୍ଣ୍ଣ ଦୁର୍ବଳ ରହିଛି। ସକାଳୁ ଓ ଅପରାହ୍ଣ ୨ଟାରେ ଆଉ ଦୁଇଥର ଡାକ୍ତରୀ ପରୀକ୍ଷା ପରେ ‘ଜୀନତ୍’ କେବେ ଶିମିଳିପାଳ ଫେରିବ ସେ ସଂପର୍କରେ ନିଷ୍ପତ୍ତି ନିଆଯିବ ବୋଲି ପିସିସିଏଫ୍ କହୁଥିବା ବେଳେ ତୁରନ୍ତ ତାକୁ ଶିମିଳିପାଳରେ ଛାଡ଼ିବାକୁ ଏନଟିସିଏ ନିର୍ଦ୍ଦେଶ ଦେଇଛନ୍ତି।ଏବେ ଓଡ଼ିଶା ଓ ପଶ୍ଚିମବଙ୍ଗ ବନ ବିଭାଗ, ଅଲିପୁର ଚିଡ଼ିଆଖାନାର ଡାକ୍ତର ତଥା ସୁନ୍ଦରବନ ଟାଇଗର ରିଜର୍ଭର କର୍ମଚାରୀଙ୍କୁ ନେଇ ଗଠିତ ଟିମ୍ ‘ଜୀନତ୍’ ଉପରେ ନଜର ରଖିଛନ୍ତି। ବାଘୁଣୀ ସୁସ୍ଥ ହେବା ପରେ ଯଥାଶୀଘ୍ର ହସ୍ତାନ୍ତର ପାଇଁ ପଶ୍ଚିମବଙ୍ଗ ବନ ବିଭାଗକୁ ଅନୁରୋଧ କରାଯାଇଛି ବୋଲି ଆଜି ଭୁବନେଶ୍ବରରେ ପିସିସିଏଫ୍ ପ୍ରେମ୍ କୁମାର ଝା ଗଣମାଧ୍ୟମକୁ କହିଛନ୍ତି।
