ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣ ଘଟଣାକୁ ନେଇ ଭାରତ ଓ ପାକିସ୍ତାନ ମଧ୍ୟରେ ଉତ୍ତେଜନା ଲାଗି ରହିଛି। ଏଭଳି ଘଡିସନ୍ଧି ମୁହୂର୍ତ୍ତରେ ପାକିସ୍ତାନ ସେନା ସହ ସରକାରଙ୍କ ମତଭେଦ ଲୋକଲୋଚନକୁ ଆସିଛି।
ପହଲଗାମରେ ୨୬ ଜଣ ଲୋକଙ୍କର ମୃତ୍ୟୁର ପ୍ରତିଶୋଧ ନେବା ପାଇ ଭାର ‘ଅପରେସନ୍ ସିନ୍ଦୂର’ ଆରମ୍ଭ କରିଦେଇଛି। ଗୁରୁବାର ପାକିସ୍ତାନର ତରଫରୁ ରାଜସ୍ଥାନ, ପଂଜାବ ଓ ଜମ୍ମୁ କଶ୍ମୀରର ପ୍ରାୟ ୧୫ଟି ସହରକୁ ଟାର୍ଗେଟ କରାଯାଇଥିବା ବେଳେ ଭାରତ ଏହାର କଡ଼ା ଜାବବ ଦେଇଛି। ଭାରତର ଏହି ଅପରେସନ୍ ଯୋଗୁଁ ପାକିସ୍ତାନ ବିଚଳିତ ହୋଇପଡ଼ିଛି। ଏହାରି ମଧ୍ୟରେ ପାକିସ୍ତାନ ସେନାରେ ବିଦ୍ରୋହ ଖବର ଆସୁଛି, ଯାହାକି ସୋସିଆଲ ମିଡିଆରେ ଟ୍ରେଣ୍ଡ୍ କରୁଛି।
ପହଲଗାମ ଆକ୍ରମଣ ପରଠାରୁ କିଛିଦିନ ଧରି ନିଖୋଜ ଥିବା ପାକିସ୍ତାନ ସେନା ମୁଖ୍ୟ ଅସୀମ ମୁନିର ଭାରତକୁ ଧମକ ଦେଇଥିଲେ। ତଥାପି, ଏହି ଧମକରେ ମୁନିର ଭୟଭୀତ ଥିବା ଭାବରେ ଜଣାପଡିଥିଲା। ସେନା ମୁଖ୍ୟ ଜେନେରାଲ ମୁନିର କହିଥିଲେ ଯେ ଯଦି ଭାରତ କୌଣସି ପ୍ରକାରେ ଆକ୍ରମଣ କରେ, ତେବେ ଏହାର ପୂର୍ଣ୍ଣ ବଳରେ ଜବାବ ଦିଆଯିବ। ମୁନିର ଗତ ଗୋଟିଏ ସପ୍ତାହ ଧରି ନିୟନ୍ତ୍ରଣ ରେଖାରେ ଭାରତୀୟ ସେନା ଗୁଳି ଚଳାଇଥିବା ମଧ୍ୟ ଅଭିଯୋଗ କରିଥିଲେ। ପହଲଗାମ ଆତଙ୍କବାଦୀ ଆକ୍ରମଣ ପରଠାରୁ ମୁନିରର ପତ୍ତା ଜଣା ନ ଥିଲା। ସୋସିଆଲ ମିଡିଆରେ ତାଙ୍କ ନାମରେ ‘ନିଖୋଜ’ ଟ୍ରେଣ୍ଡ ଚାଲିଥିଲା।
ଗୋଟିଏ ମାସ ମଧ୍ୟରେ ପାକିସ୍ତାନୀ ସେନାର ପ୍ରାୟ ୪,୫୦୦ ସୈନିକ ଏବଂ ଅଧିକାରୀ ଇସ୍ତଫା ଦେଇଛନ୍ତି। ଗଣମାଧ୍ୟମ ରିପୋର୍ଟରେ ଏହା ମଧ୍ୟ କୁହାଯାଇଛି ଯେ ଭାରତ ସହିତ କିଛି ଦିନ ପାଇଁ ଯୁଦ୍ଧ କରିବା ପାଇଁ ପାକିସ୍ତାନ ପାଖରେ ଗୋଳାବାରୁଦ ନାହିଁ।
ଏହି ସମୟରେ, ପାକିସ୍ତାନ ସରକାର ଏବଂ ସେନା ମଧ୍ୟରେ ମତଭେଦ ଥିବା ରିପୋର୍ଟ ମଧ୍ୟ ପ୍ରକାଶ ପାଇଛି। ପାକ୍ ପ୍ରଧାନମନ୍ତ୍ରୀ ଶାହବାଜ ସରିଫ ଆଇଏସଆଇ ମୁଖ୍ୟ ଅସୀମ ମାଲିକଙ୍କୁ ଜାତୀୟ ସୁରକ୍ଷା ପରାମର୍ଶଦାତା ଭାବରେ ନିଯୁକ୍ତ କରି ମୁନିରଙ୍କ ପ୍ରତିଷ୍ଠାକୁ ହ୍ରାସ କରିବାକୁ ଚେଷ୍ଟା କରାଯାଉଛି ବୋଲି କୁହାଯାଇଛି।
