ପ୍ରେମ ନିବେଦନ କରି ବିଫଳ ହେବା ପରେ ଜଣେ ଯୁବତୀଙ୍କ ଗଳାକାଟି ହତ୍ୟା କରି ଜଙ୍ଗଲରେ ଲୁଚିଥିଲା ଯୁବକ। କିନ୍ତୁ ପୁଲିସକୁ ଦେଖି ବିଷ ପିଇଦେଲା।
ଖବର ନେବାରୁ ଜଣାପଡ଼ିଛି ଯେ, ବାଲେଶ୍ବର ଜିଲ୍ଲା ସୋର ପୌର ପରିଷଦର ଲିଙ୍ଗପଡ଼ା ଗ୍ରାମର ଜ୍ୟୋତିର୍ମୟୀ ରଣା ବେଙ୍ଗାଳୁରୁରେ ରହି ଏକ ଘରୋଇ ସଂସ୍ଥାରେ କାମ କରୁଥିଲେ। ସେ ଯେଉଁ ସଂସ୍ଥାରେ କାମ କରୁଥିଲେ ସେହି ସଂସ୍ଥାର ସ୍ମୃତିରଞ୍ଜନ ନାମକ ଜଣେ ଯୁବକ ତାଙ୍କୁ ପ୍ରେମ ନିବେଦନ କରିଥିଲେ। ପ୍ରେମ ନିବେଦନ କରି ବିଫଳ ହେବାରୁ ପ୍ରତିଶୋଧ ନେବାକୁ ଚାହୁଁଥିଲେ ସ୍ମୃତିରଞ୍ଜନ। ଯୁବତୀ ନିଜ ଘରକୁ ଯାଇଥିବା ବେଳେ ଯୁବକ ତାଙ୍କ ଘରେ ପହଞ୍ଚି ପୁଣି ପ୍ରେମ ନିବେଦନ କରିଥିଲେ। ଜ୍ୟୋତିର୍ମୟୀ ପ୍ରତ୍ୟାଖାନ କରିବାରୁ ଯୁବକ ଜଣଙ୍କ ତାଙ୍କ ଗଳାକାଟି ହତ୍ୟା କରିଥିବା ପୁଲିସ ପ୍ରାଥମିକ ଅନୁସନ୍ଧାନରୁ ଜାଣିବାକୁ ପାଇଛି। ଏ ନେଇ ପୁଲିସ ଏକ ମାମଲା ରୁଜୁ କରି ତଦନ୍ତ କରୁଥିଲା। ସ୍ମୃତି ରଞ୍ଜନ ଜଙ୍ଗଲ ଭିତରେ ଲୁଚିଥିବା ବେଳେ ପୁଲିସ ଆଜି ଚଢ଼ଉ କରିଥିଲା। ପୁଲିସକୁ ଦେଖି ସ୍ମୃତି ରଞ୍ଜନ ବିଷ ପିଇ ଦେଇଥିଲା। ପୁଲିସ ତାକୁ ଗୁରୁତର ଅବସ୍ଥାରେ ଉଦ୍ଧାର କରି ମେଡ଼ିକାଲରେ ଭର୍ତ୍ତି କରିଛି।