ଭକ୍ତ ଚରଣ ଦାସ ନୂଆ ପିସିସି ସଭାପତି ହେବା ପରେ ମଙ୍ଗଳବାର କଂଗ୍ରେସ ସଂକଳ୍ପ ପଦଯାତ୍ରା ଆୟୋଜନ କରିଛି। ଏଥିରେ ହଜାର ହଜାର କର୍ମୀ ସାମିଲ ହୋଇଛନ୍ତି। କଂଗ୍ରେସର ସଂକଳ୍ପ ପଦଯାତ୍ରାରେ ସାମିଲ ହୋଇଛନ୍ତି ନବନିଯୁକ୍ତ ପିସିସି ସଭାପତି ଭକ୍ତ ଚରଣ ଦାସ। ସବୁଠାରୁ ଆକର୍ଷଣ ସାଜିଛନ୍ତି ବରିଷ୍ଠ କଂଗ୍ରେସ ନେତା ସୁରେଶ କୁମାର ରାଉତରାୟ ଓ ତାଙ୍କ ପୁଅ ମନ୍ମଥ ରାଉତରାୟ।

ମଧ୍ୟାହ୍ନରେ ଭକ୍ତ ବିମାନ ଯୋଗେ ଦିଲ୍ଲୀରୁ ଭୁବନେଶ୍ବରରେ ପହଞ୍ଚିଥିଲେ। ତାଙ୍କୁ ସ୍ବାଗତ କରିବା ପାଇଁ ହଜାର ହଜାର କର୍ମୀ ଏକତ୍ରିତ ହୋଇଥିଲେ। ଭକ୍ତ ଦାସ ଜିନ୍ଦାବାଦ, ପ୍ରଦେଶ କଂଗ୍ରେସ ଜିନ୍ଦାବାଦ ସ୍ଲୋଗାନରେ ବିମାନବନ୍ଦର ପ୍ରକମ୍ପିତ ହୋଇଥିଲା। ତା ପରେ ଭକ୍ତଙ୍କୁ ଏକ ବଡ ପଟୁଆରରେ ନିଆଯାଇ ଦଳର ଐତିହାସିକ ସଂକଳ୍ପ ଯାତ୍ରାରେ ସାମିଲ କରାଯାଇଥିଲା।
ପ୍ରକାଶ ଥାଉ କି ପ୍ରଦେଶ କଂଗ୍ରେସ କମିଟି ସଭାପତି ହେବା ପରେ ଭକ୍ତ ପ୍ରଥମେ ଏକ ଗୁରୁତତ୍ୱପୂର୍ଣ ଘୋଷଣା କରିଥିଲେ। ସମସ୍ତ ନିଲମ୍ବିତ ନେତାଙ୍କୁ ବିନା ସର୍ତ୍ତରେ ଦଳକୁ ସ୍ବାଗତ କରିଥିଲେ। ଏମିତି କି ଯେଉଁମାନେ ନିଜପଟୁ ଦଳ ଛାଡିଥିଲେ ସେମାନଙ୍କୁ ପୁନର୍ବାର ସ୍ବାଗତ କରିଥିଲେ ଓ ତାଙ୍କୁ ପୂର୍ବଭଳି ସମ୍ମାନ ମିଳିବ ବୋଲି ଘୋଷଣା କରିଥିଲେ। ଫଳରେ ଦଳ ଛାଡିଥିବା ଅନେକ ନେତା କଂଗ୍ରେସକୁ ଫେରି ଆସିଛନ୍ତି। ଯେଉଁମାନଙ୍କୁ ଆଜି ପଦଯାତ୍ରାରେ ଦେଖିବାକୁ ମିଳିଥିଲା।