ନିଜକୁ ପ୍ରଧାନମନ୍ତ୍ରୀଙ୍କ ପ୍ରମୁଖ ସଚିବଙ୍କ ଝିଅ ଜ୍ବାଇଁ କହି ବଦବଡିଆଙ୍କୁ ଠକୁଥିଲେ ଯୁବକ ଯୁବତୀ

ଭୁବନେଶ୍ୱର, ୩୦/୧୨ (ଓଡ଼ିଶା ଜାଗରଣ): ଠକେଇ ପାଇଁ ଭିନ୍ନ ଭିନ୍ନ ତରିକା ଅସ୍ପାନାଉଛନ୍ତି ଠକ। ରାଜ୍ୟର ପ୍ରତିଷ୍ଠିତ ଲୋକଙ୍କ ନାଁ ନେଇ ଦୀର୍ଘଦିନ ଧରି ଠକେଇ କରି ଆସୁଥିଲେ ଯୁବକ ଯୁବତୀ। ନିଜକୁ ପ୍ରଧାନମନ୍ତ୍ରୀଙ୍କ ପ୍ରମୁଖ ସଚିବ ବୋଲି କହି ଠକେଇ କରୁଥିବା ଦୁଇଜଣଙ୍କୁ ଗିରଫ କରିଛି ପୋଲିସ। ଗିରଫ ଦୁଇଜଣ ହେଲେ କଳାହାଣ୍ଡିର ହଂସିକା ଅଭିଲିପ୍ସା ଓ ଭୁବନେଶ୍ୱରର ଅନିଲ ମହାନ୍ତି।

ଅନିଲ ଜଣେ ବ୍ୟବସାୟୀ। ତାଙ୍କ ନାଁରେ ଦୁଇଟି ପଞ୍ଜୀକୃତ କମ୍ପାନୀ ମଧ୍ୟ ରହିଛି। ପଟିଆରେ ନିଜର କାର୍ଯ୍ୟାଳୟ ମଧ୍ୟ ଖୋଲିଛନ୍ତି। ଅନିଲଙ୍କ ବନ୍ଧବୀ ହେଉଛନ୍ତି କଳାହାଣ୍ଡି ହଂସିକା। ଉଭୟ ଏବେ ଭୁବନେଶ୍ୱରରେ ରହୁଛନ୍ତି। ସବୁଠୁ ବଡ଼ କଥା ହେଉଛି ଉଭୟ ନିଜକୁ ପ୍ରଧାନମନ୍ତ୍ରୀଙ୍କ ପ୍ରମୁଖ ସଚିବ ପି.କେ ମିଶ୍ରଙ୍କ ଝିଅ ଓ ଜ୍ୱାଇଁ ବୋଲି ପରିଚୟ ଦେଇ ପ୍ରତିଷ୍ଠିତ ଲୋକଙ୍କୁ ଟାର୍ଗେଟ କରୁଥିଲେ। ଖାଲି ସେତିକି ନୁହେଁ, ଓଡ଼ିଶାର ମୁଖ୍ୟଶାସନ ସଚିବ ମନୋଜ ଆହୁଜା, ପୂର୍ବତନ ସିଏଜି ଗିରିଶ ମୁର୍ମୁଙ୍କ ପରି ବଡ଼ବଡ଼ିଆଙ୍କ ସହିତ ନିଜର ଫଟୋକୁ ଏଡିଟ୍‌ କରି ଦେଖାଉଥିଲେ। ଆଉ ବିଭିନ୍ନ ଉପାୟରେ ଠକି ନେଉଥିଲେ କୋଟିକୋଟି ଟଙ୍କା। ପୁଲିସ ଅଭିଯୋଗ କ୍ରମେ ତଦନ୍ତ କରୁଛି।