ଆପଣ ଶୁଣିଲେ ଆଶ୍ଚର୍ଯ୍ୟ ହୋଇ ପାରନ୍ତି। ମିନେରାଲ ପାଣି ବୋତଲ ଭିତରେ ଦେଶୀ ମଦ ପାର୍ଶଲ ହୋଇ ବଜାରକୁ ଛଡ଼ା ଯାଉଥିଲା। ଗ୍ରାହକ ବି ସୁବିଧା ଉପାୟରେ ତାକୁ କିଣି ପିଉଥିଲେ। ମିନେରାଲ ପାଣି ବୋତଲରେ ଏଭଳି ମଦ ବିକ୍ରି ନେଇ ସୂଚନା ପାଇବା ପରେ ଖୋଳତାଡ କରିଥିଲା ଅବକାରୀ ବିଭାଗ।
ଚେର ଖୋଜୁ ଖୋଜୁ ଭୁବନେଶ୍ୱର ଉପକଣ୍ଠରେ ପହଞ୍ଚିଥିଲା ଅବକାରୀ ବିଭାଗ। ଦରୁଠେଙ୍ଗ ଅଞ୍ଚଳରେ ଥିବା ଜଙ୍ଗଲ ଭିତରେ ଚାଲିଥିବା ମିନେରାଲ ପାଣି ପ୍ରସ୍ତୁତ କାରଖାନାରେ ପହଞ୍ଚିବା ପରେ ଆଶ୍ଚର୍ଯ୍ୟଜନକ ତଥ୍ୟ ହାସଲ କରିଥିଲେ ଅବକାରୀ ଅଧିକାରୀ।
ଜଣାପଡିଲା ଯେ ଯେଉଁ ପାଣି ଫ୍ୟକ୍ତ୍ତିରେ ସେମାନେ ପହଞ୍ଚିଛନ୍ତି ତାହା ପ୍ରକୃତରେ ପାଣି ଫ୍ୟାକ୍ଟ୍ରି ନୁହେଁ ବରଂ ବେଆଇନ ମଦ ତିଆରି କାରଖାନା। ଚଢ଼ଉ ପରେ ୧୦ ହଜାର ଲିଟର ଦେଶୀ ମଦ ଜବତ କରିଥିଲା ଅବକାରୀ ବିଭାଗ। ଯାହାର ବଜାର ମୂଲ୍ୟ ପ୍ରାୟ ୧୯ ଲକ୍ଷ ଟଙ୍କା। ଏଥି ସହିତ କାରଖାନାର ମାଲିକ ସମେତ ୩ ଜଣଙ୍କୁ ଗିରଫ ମଧ୍ୟ କରାଯାଇଛି।
ଖବର ନେବାରୁ ଜଣା ପଡ଼ିଛି ଯେ, ପାଣି ପ୍ୟାକିଂ କାରଖାନାରେ ଦେଶୀ ମଦ ପ୍ରସ୍ତୁତ କରାଯାଇ ବିକ୍ରି ପାଇଁ ରାଜଧାନୀ ସମେତ ଉପକଣ୍ଠବର୍ତ୍ତୀ ଅଞ୍ଚଳ ତଥା କଟକ ଓ ଏହାର ଆଖପାଖ ଅଞ୍ଚଳକୁ ପଠା ଯାଉଥିଲା। ସେହିଭଳି ପାଣି ଗାଡ଼ିରେ ରାଜ୍ୟର ଅନ୍ୟ ଜିଲ୍ଲାକୁ ପଠା ଯାଉଥିଲା।
ପୁଲିସ ଏ ନେଇ ଅଧିକ ତଦନ୍ତ ଜାରି ରଖିବା ସହ ଘଟଣା ଅନୁସନ୍ଧାନ କରୁଛି।
