ତିବତ୍ତିୟ ବୌଦ୍ଧ ଧର୍ମର ସର୍ବୋଚ୍ଚ ଧର୍ମଗୁରୁ ଦଲାଇଲାମାଙ୍କୁ ମିଳିପାରେ ଭାରତର ସର୍ବୋଚ୍ଚ ସମ୍ମାନ ଭାରତ ରତ୍ନ। ଏ ନେଇ ଭାରତର ୮୦ ଜଣ ସାଂସଦ ସମ୍ମତି ପ୍ରଦାନ କରିଛନ୍ତି।

ତାଙ୍କର ୯୦ ତମ ଜନ୍ମଦିନ ପାଳନ ଅବସରରେ ଉତ୍ତରାଧିକାରୀ ଚୟନ ପ୍ରକ୍ରିୟା ଆରମ୍ଭ ହେବ। ତେବେ ଉତ୍ତରାଧିକାରୀ ବଛା ହେବା ନେଇ ଦଲାଇଲାମାଙ୍କ ଘୋଷଣା ପରେ ଚୀନ୍‌ ଭୀଷଣ କ୍ଷୁବ୍‌ଧ ହୋଇଥିବା ଜଣାପଡ଼ିଛି।
କେବଳ ଏତିକି ନୁହେଁ, ଭାରତକୁ ମଧ୍ୟ ଏ ନେଇ ଚେତାବନୀ ମଧ୍ୟ ଶୁଣାଇଛି। ଏବେ ଭାରତର ଆଉ ଏକ ପଦକ୍ଷେପ ଚୀନକୁ ଆହୁରି ଚିଡ଼ାଇବାର ସମ୍ଭାବନାକୁ ଏଡ଼ାଇ ଦିଆଯାଇ ନ ପାରେ। ତାହା ହେଉଛି ଦଲାଇ ଲାମାଙ୍କୁ ଭାରତ ରତ୍ନ ଦିଆଯିବାକୁ ଏକ ପ୍ରସ୍ତାବ ସରକାରଙ୍କ ନିକଟକୁ ପ୍ରେରଣ କରାଯାଇଛି। ବିଭିନ୍ନ ଦଳର ସାଂସଦମାନେ ଏହି ପ୍ରସ୍ତାବକୁ ସମର୍ଥନ ଜଣାଇଛନ୍ତି।
ଏ ନେଇ ଏକ ପ୍ରସ୍ତାବ ସରକାରଙ୍କ ନିକଟକୁ ପଠାଯାଇଥିବା ଜଣାପଡ଼ିଛି। ପ୍ରସ୍ତାବରେ ୮୦ ଜଣ ସାଂସଦ ମଧ୍ୟ ସ୍ୱାକ୍ଷର କରିଛନ୍ତି। ପତ୍ରକୁ ତିବ୍ୱତ ପାଇଁ ସର୍ବଦଳୀୟ ସଂସଦୀୟ ଫୋରମ୍‌ ପକ୍ଷରୁ ପଠାଯାଇଛି। ଏହି ଫୋରମ୍‌ରେ ବିଜେପି, ବିଜେଡି, ଜେଡିୟୁ ଆଦି ଦଳର ସାଂସଦମାନେ ସଦସ୍ୟ ଅଛନ୍ତି। ଏହା ସହିତ ସଂସଦର ଏକ ମିଳିତ ଅଧିବେଶନକୁ ସମ୍ବୋଧନ କରିବାକୁ ଦଲାଇଲାମାଙ୍କୁ ନିମନ୍ତ୍ରଣ କରିବାକୁ ଫୋରମ୍‌ ପକ୍ଷରୁ ପ୍ରସ୍ତାବ ଦିଆଯାଇଛି।
ଭାରତ ରତ୍ନ ହେଉଛି ଦେଶର ସର୍ବୋଚ୍ଚ ବେସାମରିକ ସମ୍ମାନ। ଏହା ଭାରତୀୟ ନାଗରିକମାନଙ୍କୁ ହିଁ ଦିଆଯାଇଥାଏ। କିନ୍ତୁ ଏପର୍ଯ୍ୟନ୍ତ ୩ ଜଣ ବିଦେଶୀଙ୍କୁ ମଧ୍ୟ ଏହି ସମ୍ମାନ ଦିଆଯାଇଛି। ପୂର୍ବରୁ ଖାଁ ଅବ୍ଦୁଲ ଗଫୁର ଖାଁ, ନେଲସନ୍‌ ମାଣ୍ଡେଲା ଓ ମଦର ଟେରେସାଙ୍କୁ ଏହି ସମ୍ମାନ ଦିଆଯାଇଥିଲା।