ବାରବାଟି ଷ୍ଟାଡିୟମରେ ଭାରତ – ଇଂଲଣ୍ଡ ମଧ୍ୟରେ ଚାଲିଥିବା ଦିନିକିଆ କ୍ରିକେଟ ମ୍ୟାଚର ପ୍ରଥମ ଇନିଂସରେ ଇଂଲଣ୍ଡ ବ୍ୟାଟିଂ କରି ୩୦୪ ରନ୍ ସଂଗ୍ରହ କରିଛି। ଶେଷ ବଲ୍ ପୂର୍ବରୁ ଇଂଲଣ୍ଡ ଦଳର ସମସ୍ତ ଖେଳାଳି ଆଉଟ୍ ହୋଇଯାଇଛନ୍ତି। ଅପରପକ୍ଷେ ଭାରତ ପାଇଁ ୩୦୫ ରନର ବିଜୟ ଲକ୍ଷ୍ୟ ରହିଛି।

ରବିବାର ଅପରାହ୍ନ ସାଢ଼େ ଗୋଟାଏରେ ଇଂଲଣ୍ଡ ଓ ଭାରତ ମଧ୍ୟରେ ମ୍ୟାଚ୍ ଅନୁଷ୍ଠିତ ହୋଇଥିଲା। ଇଂଲଣ୍ଡ ଦଳର ଜୋ ରୁଟ୍, ବେନ୍ ଡକେଟ ଏବଂ ଲିଭିଂଷ୍ଟୋନ୍ ଙ୍କ ଗୁରୁତ୍ୱପୂର୍ଣ୍ଣ ଇନିଂସ ବଡ଼ ରନ ସଂଗ୍ରହ କରିବାରେ ସଫଳ ହୋଇଛନ୍ତି। ଇଂଲଣ୍ଡ ଦଳର ଜୋ ରୁଟ୍ ସର୍ବାଧିକ ୬୯ ରନ ସଂଗ୍ରହ କରିଥିବା ବେଳେ ବେନ୍ ଡକେଟ ୬୫ ରନ ହାସଲ କରିଥିଲେ। ପରେ ଲିଭିଂଷ୍ଟୋନ୍ ଇଂଲଣ୍ଡକୁ ୩୦୦ ରନ ଅତିକ୍ରମ କରିବାକୁ ନିଶ୍ଚିତ କରିଥିଲେ। ସେ ୩୨ ବଲ ୪୧ ରନ ସଂଗ୍ରହ କରିଥିଲେ। ସବୁଠାରୁ ବଡ କଥା ହେଉଛି ଇଂଲଣ୍ଡ ଦଳର ତିନିଜଣ ଖେଳାଳି ରନ ଆଉଟ୍ ହୋଇଯାଇଥିଲେ।

ଭାରତ ପାଇଁ ରବିନ୍ଦ୍ର ଜାଡେଜା ସର୍ବାଧିକ ୩ ଟି ୱିକେଟ ନେଇଛନ୍ତି। ସେହିଭଳି ବରୁଣ ଚକ୍ରବର୍ତ୍ତୀ, ହାର୍ଦ୍ଦିକ ପାଣ୍ଡ୍ୟା, ହର୍ଷିତ ରାଣା ଏବଂ ଶାମି ପ୍ରତ୍ୟେକେ ଗୋଟିଏ ୱିକେଟ୍ ନେବାରେ ସଫଳ ହୋଇଛନ୍ତି।