ଗତକାଲି ନବନିଯୁକ୍ତ ପିସିସି ସଭାପତି ଭକ୍ତଚରଣ ଦାସ ନିଲମ୍ବିତ ଓ ଇସ୍ତଫା ଦେଇଥିବା ସମସ୍ତ କଂଗ୍ରେସ ନେତାଙ୍କୁ ପୁନର୍ବାର ଦଳକୁ ସ୍ୱାଗତ କରିବା ପରେ ଆଜି ସକାଳେ ସୁର ନିଜ ଘରେ ନଡ଼ିଆ ବାଡେ଼ଇ ପୂଜା ପାଠ କରି କଂଗ୍ରେସ ଭବନ ଭିତରକୁ ପ୍ରବେଶ କରିଥିଲେ। ପ୍ରବେଶ କରିବା ସମୟରେ ଆତ୍ମ ବିହ୍ୱଳ ହୋଇପଡ଼ିଥିଲେ ସୁର। ପ୍ରବେଶ କରିବା କ୍ଷଣି ଭୋ ଭୋ ହୋଇ କାନ୍ଦି ପକାଇଥିଲେ। ଏହି ଅବସରରେ ସୁର କହିଛନ୍ତି ଯେ, କଂଗ୍ରେସ ଭବନ ହେଉଛି ମୋ ପାଇଁ ମନ୍ଦିର। ନେହୁର ପରିବାର ମୋ ପାଇଁ ଦେବତା। ୧୯୬୨ ମସିହାଠାରୁ ଦଳ ସହିତ ରହି ଆସିଛି ଏବଂ ଦଳ ପାଇଁ କାମ କରି ଆସିଛି। ତେଣୁ ଦଳପ୍ରତି ମୋର ଆନୁଗତ୍ୟ ରହିଥିଲା ଓ ରହିଛି। ଦଳ ମୋତେ ପୁନର୍ବାର ଆସିବାର ସୁଯୋଗ ଦେଇଥିବାରୁ ରାହୁଲ ଗାନ୍ଧୀଙ୍କୁ ଧନ୍ୟବାଦ ଦେଇଛନ୍ତି।
କେବଳ ନିଜେ ଦଳରେ ସାମିଲ ହୋଇନାହାନ୍ତି, ଯେଉଁମାନେ ଦଳ ବାହାରେ ଅଛନ୍ତି ସେମାନେ କଂଗ୍ରେସକୁ ଫେରି ଆସିବା ପାଇଁ ନିବେଦନ କରିଛନ୍ତି। ସେ ଆହୁରି ମଧ୍ୟ କହିଛନ୍ତି ଯେ, ଯେଉଁମାନେ ପିସିସି ଲବିରେ ଥିଲେ ମେମାନେ ସମସ୍ତେ ଭୁଲିଯାଇ ଦଳକୁ ଫେରି ଆସନ୍ତୁ। ଭକ୍ତ ଦାସ ଜଣେ ଭଲ ନେତା। ତେଣୁ ତାଙ୍କ ସହ କାମ କରିବାକୁ ଆସିଲେ ଦଳ ପୁଣିଥରେ ପୂର୍ବ ସ୍ଥିତିକୁ ଫେରି ଆସିବ ବୋଲି କହିଛନ୍ତି ସୁର।