ଆଉ ୪ ଦିନ ପରେ ଭାରତ – ଇଂଲଣ୍ଡ କ୍ରିକେଟ୍ ମ୍ୟାଚ୍। କିନ୍ତୁ ଆଜିଠାରୁ ଟିକେଟ ପାଇଁ କାଉଣ୍ଟର ଆଗରେ ଠେଲାପେଲା ଦେଖିବାକୁ ମିଳିଛି।
ରବିବାର ବାରବାଟୀ ଷ୍ଟାଡିୟମ୍ରେ ଅନୁଷ୍ଠିତ ହେବାକୁ ଯାଉଛି ଭାରତ-ଇଂଲଣ୍ଡ ମଧ୍ୟରେ ଦିନିକିଆ କ୍ରିକେଟ ମ୍ୟାଚ୍। ଓଡ଼ିଶା କ୍ରିକେଟ୍ ଆସୋସିଏସନ (ଓସିଏ) ପକ୍ଷରୁ ଅଫଲାଇନରେ ଟିକେଟ ବିକ୍ରି ଜାରି ରହିଥିବା ବେଳେ ବୁଧବାର ଟିକେଟ ପାଇଁ ଷ୍ଟାଡିୟମ୍ ଆଗରେ ଥିବା କାଉଣ୍ଟରରେ ପ୍ରବଳ ଭିଡ ପରିଲକ୍ଷିତ ହୋଇଥିଲା। ଗତକାଲି ରାତିରୁ ଟିକେଟ ପାଇଁ ଅପେକ୍ଷା କରିଥିବା କ୍ରିକେଟ ପ୍ରେମୀଙ୍କ ମଧ୍ୟରେ ଉତ୍ସାହ ରହିଥିବା ବେଳେ ମଧ୍ୟାହ୍ନ ବେଳକୁ ଭିଡ ଆହୁରି ବଢି ଯାଇଥିଲା। ଗୁଳୁଗୁଳି ସାଙ୍ଗକୁ ଭିଡ଼ରେ ଫସି ଯାଇଥିଲେ କ୍ରିକେଟ ପ୍ରେମୀ। ପରିସ୍ଥିତି ଏଭଳି ହୋଇଥିଲା ଯେ ଲୋକେ ଠେଲାପେଲା କରିବା ଆରମ୍ଭ କରିଥିଲେ। ଦଳାଚକଟା ଯୋଗୁଁ ଅନେକ ଗୁରୁତର ଆହତ ହୋଇଥିଲେ। ପରିସ୍ଥିତି ଅଣାୟତ୍ତ ହେବାରୁ କଟକ ଡିସିପି ଘଟଣାସ୍ଥଳରେ ପହଞ୍ଚି ପରିସ୍ଥିତିକୁ ଆୟତ୍ତ କରିଥିଲେ। ଏଣେ ଟିକେଟ କିଣୁଥିବା ଲୋକଙ୍କ ପାଇଁ ଓସିଏ ପକ୍ଷରୁ ପିଇବା ପାଣି ଭଳି ସର୍ବନିମ୍ନ ବ୍ୟବସ୍ଥା କରାଯାଇ ନ ଥିବାରୁ କ୍ରିକେଟପ୍ରେମୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି।
ସୂଚନାଯୋଗ୍ୟ, ମଙ୍ଗଳବାର ସଂଧ୍ୟା ସୁଦ୍ଧା ଓସିଏ ସହ ଅନୁବନ୍ଧିତ ୭୦ରୁ ଅଧିକ ଅନୁଷ୍ଠାନ ଏବଂ ଓସିଏ କର୍ମକର୍ତ୍ତାଙ୍କ ପାଇଁ ଟିକେଟ ବିକ୍ରି ସରିଯାଇଛି। ଏମାନଙ୍କ ଲାଗି ପାଖାପାଖି ୯ ହଜାର ଟିକେଟ ବିକ୍ରି ପାଇଁ ରହିଥିଲା। ୨ ତାରିଖରେ ଅନ୍ଲାଇନରେ ୪ ହଜାର ଟିକେଟ ବିକ୍ରି ହୋଇଥିଲା। ବୁଧଠାରୁ ଦୁଇଦିନ ଧରି ଷ୍ଟାଡିୟମ କାଉଣ୍ଟର୍ରେ ସାଧାରଣ ଦର୍ଶକଙ୍କ ପାଇଁ ଟିକେଟ ବିକ୍ରି କରାଯାଉଛି। ବାରବାଟୀ ଷ୍ଟାଡିୟମ୍ର ଦର୍ଶକ କ୍ଷମତା ୪୪୫୭୪ ରହିଥିବା ବେଳେ ସେଥିମଧ୍ୟରୁ ୨୪୬୯୨ ଟିକେଟ ବିକ୍ରି ପାଇଁ ରହିଥିଲା।
