ଜଙ୍ଗଲ ମଝିରେ କଳାହୀରାର ଖଣି
ସୁ୍ନ୍ଦରଗଡ଼଼ ଜିଲ୍ଲା ଗୋପାଳପୁର ଗାଁ ଡେଇଁ କୁଲାପଡା ଓ ତେଲେନଡିହି ରିର୍ଜଭ ଫରେଷ୍ଟ ଭିତରେ କୋଇଲା ଖଣି ଠାବ କରିଛି ଜିଲ୍ଲା ପ୍ରଶାସନ। ଠାବ ହୋଇଥିବା ଖଣିଗୁଡ଼ିକ ମଧ୍ୟରୁ ୭ଟି ଖଣିର କୋଇଲାଗଦାରେ ନିଆଁ ଲଗାଇ ନଷ୍ଟ କରିଛି ଜିଲ୍ଲା ପ୍ରଶାସନ। ଫଳରେ ଜଙ୍ଗଲ ଭିତରେ ଖଣି ଜଳୁଥିବା ଦେଖିବାକୁ ମିଳିଛି।
ଖବର ନେବାରୁ ଜଣାପଡ଼ିଛି ଯେ, ଦୀର୍ଘଦିନ ଧରି ସୁନ୍ଦରଗଡ଼଼ ଜିଲ୍ଲାରେ ଚାଲିଥିବା ବେଆଇନ ଖଣିଗୁଡ଼ିକ ମଧ୍ୟରୁ ପ୍ରତିଦିନ କୋଟି କୋଟି ଟଙ୍କାର କୋଇଳା ରାଜ୍ୟ ବାହାରକୁ ଚାଲାଣ କରାଯାଉଥିବା ଜଣାପଡ଼ିଛି। ଏ ନେଇ ସୂଚନା ପାଇବା ପରେ ଚୋରା ଖଣି ଉପରେ ପ୍ରଶାସନ, ପୁଲିସ ଓ ବନବିଭାଗ ପକ୍ଷରୁ ଚଢ଼ାଉ କରାଯାଇଥିଲା। ଏଥିରେ ସୁନ୍ଦରଗଡ଼଼ ଉପଜିଲ୍ଲାପାଳ ଦାଶରଥି ସରାବୁ, ଏସ୍ଡିପିଓ ନିର୍ମଳ ମହାପାତ୍ର, ସୁନ୍ଦରଗଡ଼଼ ତହସିଲଦାର କୁଳମଣି ରଣବିଡ଼ା, ହେମଗିର ତହସିଲଦାର ସାରିକା ଧମେଲ ସାମିଲ ହୋଇଥିଲେ।
ଚଢ଼ଉ ସମୟରେ ଜଙ୍ଗଲ ମଝିରେ ପ୍ରାୟ ୧୦୦ରୁ ଅଧିକ ଚୋରା କୋଇଲା ଖଣି ଠାବ କରାଯାଇଛି। ସରକାରୀ ଖଣି ଭଳି ଉପର ମାଟି ବାହାର କରି ଟନ୍ ଟନ୍ କୋଇଲା ବାହାର କରାଯାଇ ବିକ୍ରି କରାଯାଉଥିବା ଜଣାପଡ଼ିଛି। କଳାହାରୀ କୁହାଯାଉଥିବା ମୂଲ୍ୟବାନ କୋଇଲାକୁ ବାହାର ରାଜ୍ୟ ଛତିଶଗଡ଼଼, ଝାରଖଣ୍ଡ, ମଧ୍ୟପ୍ରଦେଶ, ଉତରପ୍ରଦେଶ ଏବଂ ରାଜ୍ୟର ବିଭିନ୍ନ ଅଞ୍ଚଳରେ କୋଟି କୋଟି ଟଙ୍କାରେ ମାଫିଆମାନେ ବିକ୍ରି କରୁଥିବା ଜଣାପଡ଼ିଥିଲା। ଜଙ୍ଗଲ ଭିତରେ ୠଦାଗଦା କୋଇଲା ଗଚ୍ଛିତ ରଖାଯାଇଥିବା ଜଣାପଡ଼ିଥିଲା।
ଜଙ୍ଗଲ ଭିତରେ ଥିବା ବେଆଇନ କୋଇଲା ଖଣିରୁ କୋଇଲା ବାହାର କରି ମୁଖ୍ୟ ରାସ୍ତା ଦେଇ ବାହାର ରାଜ୍ୟର ବିଭିନ୍ନ ଅଞ୍ଚଳକୁ ତଥା ରାଜ୍ୟ ବାହାରକୁ ଚାଲାଣ କରାଯାଉଥିବା ପ୍ରଶାସନ ଜାଣିବାକୁ ପାଇଥିଲା। ବଡ଼ ଆଶ୍ଚର୍ଯ୍ୟଜନକ କଥା ହେଉଛି ଏତେ ବଡ଼ବଡ଼ କୋଇଲା ଖଣି ଜଙ୍ଗଲ ଭିତରେ ରହିଥିଲେ ମଧ୍ୟ ପୁଲିସ କିମ୍ବା ପ୍ରଶାସନ କିଭଳି ଜାଣି ପାରୁ ନ ଥିଲା ତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ସବୁଠୁ ବଡ଼ କଥା ହେଉଛି ସ୍ଥାନୀୟ ବ୍ଲକ ପ୍ରଶାସନ ଠାରୁ ଆରମ୍ଭ କରି ତହସିଲଦାର, ଆରଆଇ କିଭଳି ଏ ନେଇ ଖବର ପାଇପାରୁ ନ ଥିଲେ ତାହା ଅନେକଙ୍କୁ ବିସ୍ମିତ କରିଛି।
ଜଙ୍ଗଲ ମଝିରେ କଳାହୀରାର ଖଣି
