ଏକ ସର୍ଭେ ରିପୋର୍ଟ୍ ଅନୁଯାୟୀ ଭାରତରେ ହେଉଥିବା ଠକେଇ ପଛରେ ବ୍ୟାଙ୍କଗୁଡ଼ିକ ଦାୟୀ। ଲୋକ ମତ ଆଧାରରେ କରାଯାଇଥିବା ସର୍ବେ ଅନୁଯାୟୀ ପ୍ରାୟ ୩୭ ପ୍ରତିଶତ ଠକେଇ ପାଇଁ ବ୍ୟାଙ୍କ୍ ଦାୟୀ ବୋଲି କୁହାଯାଉଛି।

ବିଶ୍ବର ଅନ୍ୟତମ ସଫ୍ଟୱେର ଅନାଲିଟିକାଲ କମ୍ପାନୀ ଏଫଆଇସିଓ ପକ୍ଷରୁ କରାଯାଇଥିବା ସର୍ଭେରୁ ଏହା ଜଣା ପଡ଼ିଛି। ଏହି ସର୍ଭେ ଭାରତ ସମେତ ୧୪ ଟି ଦେଶର ୧୧୦୦୦ ବ୍ୟାଙ୍କ୍ ଗ୍ରାହକଙ୍କୁ ନେଇ କରାଯାଇଥିଲା। ଏହି ସର୍ଭେରେ ଉପଭୋକ୍ତାମାନଙ୍କୁ ବ୍ୟାଙ୍କର ପେମେଣ୍ଟ , ଠକେଇ ଓ ଠକେଇ ପରିଚାଳନା ସଂକ୍ରାନ୍ତ ପ୍ରଶ୍ନ ପଚରା ଯାଇଥିଲା। ସର୍ଭେରୁ ଜଣା ପଡ଼ିଛି ଯେ, ୫୬ ପ୍ରତିଶତ ଉପଭୋକ୍ତା ଠକେଇ ପରେ ବ୍ୟାଙ୍କରେ ଅଭିଯୋଗ କରିଥାନ୍ତି। ୩୦ ପ୍ରତିଶତ ଉପଭୋକ୍ତା ଏଥିପାଇଁ ବ୍ୟାଙ୍କ୍ ନିୟାମକ ସପକ୍ଷରେ ମତ ଦେଇଥିବା ବେଳେ ୩ ପ୍ରତିଶତ ଉପଭୋକ୍ତା ବ୍ୟାଙ୍କ୍ ପରିବର୍ତ୍ତନ କରିଥାନ୍ତି।

ପ୍ରକାଶ ଥାଉ କି ବ୍ୟାଙ୍କ୍ ଠକେଇ ଏବେ ଦେଶବାସୀଙ୍କ ପାଇଁ ଏକ ବଡ ସମସ୍ୟା ଭାବେ ଠିଆ ହୋଇଛି। ବିଶେଷକରି ଅନ ଲାଇନ୍ ବ୍ୟବହାର ବଢିବା ପରେ ଠକେଇ ମାତ୍ର ଦିନକୁ ଦିନ ବଢୁଥିବା ଜଣା ପଡ଼ିଛି।