କିଛିଦିନର ବ୍ୟବଧାନ ପରେ ମହାକୁମ୍ଭରେ ପୁଣି ପ୍ରବଳ ଭିଡ ପରିଲକ୍ଷିତ ହୋଇଛି। ସହରର ସବୁ ଗଳିକନ୍ଦିରେ ଗହଳି, ଭିଡର ଭୟଙ୍କର ସ୍ଥିତି। ରାଜ୍ୟ ତଥା ରାଜ୍ୟ ବାହାରୁ ଆସୁଥିବା ଶ୍ରଦ୍ଧାଳୁ ସମସ୍ୟାର ସମ୍ମୁଖୀନ ହେଉଛନ୍ତି।

କୁମ୍ଭ ମେଳରେ ଯିଏ ଯୁଆଡେ ପାରୁଛି ପଳାଉଛି, ଗାଡି ପୂରାଇ ଦେଉଛି। ସଙ୍ଗମସ୍ଥଳ ପାଇଁ ଅଲଗା ରାସ୍ତା କରାଯାଇଥିଲେ ବି କେହି ନିୟମ ମାନୁନାହାନ୍ତି। ଫଳରେ ପ୍ରୟାଗରାଜରେ ୧୨୦ କିଲୋମିଟର ରାସ୍ତା ଅତିକ୍ରମ କରିବାକୁ ୧୨ ଘଣ୍ଟା ଲାଗିଯାଉଛି।
ଲୋକେ କିଭଳି ଜଲଦି ଗନ୍ତବ୍ୟସ୍ଥଳରେ ପହଞ୍ଚିବେ ସେଥିପାଇଁ ଯିଏ ଯୁଆଡେ ପାଇଲା ପଳାଇଛନ୍ତି।
ମହାକୁମ୍ଭରେ ମହାଜାମ୍ ଦେଖି ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ବିରକ୍ତି ଭାବ ପୋଷଣ କରିଛନ୍ତି। ଭିଡର ଭୟାବହତା ଏବଂ ଭିଡ ପାଇଁ ରାଜ୍ୟ ଉପରେ ଏକ ଖରାପ ବାର୍ତ୍ତା ଯାଉଥିବାରୁ ବିରକ୍ତି ହୋଇ ଦାୟିତ୍ୱରେ ଥିବା ଦୁଇ ଆଇପିଏସ୍ ଅଫିସରଙ୍କୁ ଡାକି ଭୀଷଣ ଉଦବେଗ ପ୍ରକାଶ କରିଛନ୍ତି। ଯୋଗୀ ସେମାନଙ୍କୁ କହିଛନ୍ତି ଆପଣମାନଙ୍କ କାନ୍ଧରେ ପୂରା ପ୍ରୟାଗରାଜର ଦାୟିତ୍ବ ଥିଲା କିନ୍ତୁ ଦଳାଚକଟା ଦିନ ହେଉ କି ଅନ୍ୟ ଦିନମାନଙ୍କରେ ଆପଣ ଦାୟିତ୍ବହୀନ ଭାବେ କାମ କରିଛନ୍ତି ଯାହାର ପରିଣାମ ଭୋଗିବାକୁ ପଡିବ। ତାସହ ମହାକୁମ୍ଭର ବଡବଡ ସ୍ନାନ ବେଳେ କେମିତି ଉଚ୍ଚପଦସ୍ଥ ଅଧିକାରୀମାନେ ଅନୁପସ୍ଥିତ ରହୁଛନ୍ତି ସେନେଇ ସେମାନଙ୍କ ବିରୋଧରେ ନିଲମ୍ବନ ପରି ଦୃଢ କର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ।