ଭୁବନେଶ୍ୱର ସହରରେ ପ୍ରକଳ୍ପ ଅନୁମୋଦନ ଦାୟିତ୍ବ ବିଏମସି ହାତରେ ରହିଛି। ଏସବୁ ସତ୍ତ୍ୱେ ପ୍ରକଳ୍ପ ଅନୁମୋଦନ ଦେଉଛି ବିଡ଼ିଏ। ଏ ବାବଦରେ ରାଜସ୍ବ ମଧ୍ୟ ବିଡ଼ିଏ ନେଉଛି। କିନ୍ତୁ ତ୍ରୁଟିପୂର୍ଣ୍ଣ ପ୍ଲାନ୍ ଅନୁମୋଦନ ପାଇଁ ଯଦି ଜଳବନ୍ଦୀ ସମସ୍ୟା ସୃଷ୍ଟି ହେଉଛି ସେଥିପାଇଁ ବିଏମସି ଦୋଷ ମୁଣ୍ଡାଉଛି।
ଭୁବନେଶ୍ୱର ସହରରେ ନିର୍ମାଣଜନିତ ଯୋଜନା ଅନୁମୋଦନ ଦାୟିତ୍ବ ପୂର୍ବରୁ ବିଡ଼ିଏ ହାତରେ ରହିଥିଲା। ୨୦୧୫ରେ ଭୁବନେଶ୍ୱର ମ୍ୟୁନିସିପାଲ୍ କର୍ପୋରେସନ (ବିଏମସି)କୁ ଯୋଜନା ଅନୁମୋଦନ ଦାୟିତ୍ୱ ଦିଆଯାଇଥିଲା। କିନ୍ତୁ ଏସବୁ ସତ୍ତ୍ୱେ ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ (ବିଡିଏ) ପୂର୍ବବତ୍ ଯୋଜନା ଅନୁମୋଦନ ପ୍ରଦାନ କରିଚାଲିଛି। ଏ ବାବଦରେ ଯେଉଁ ରାଜସ୍ବ ବିଏମସିକୁ ଆସିବା କଥା ତାହା ରାଜସ୍ବ ନେଉଛି ବିଡ଼ିଏ। କିନ୍ତୁ ତାହା ବିଡ଼ିଏ ପାଣ୍ଠିକୁ ଯାଉଛି।
ସୂଚନା ଅଧିକାର (ଆରଟିଆଇ) ଆଇନ ମାଧ୍ୟମରେ ମିଳିଥିବା ତଥ୍ୟ ଅନୁଯାୟୀ ବିଡିଏ ୨୦୨୫ରୁ ୨୦୨୩ ପର୍ଯ୍ୟନ୍ତ ୨୮୫୮ ଟି ପ୍ରକଳ୍ପକୁ ମଞ୍ଜୁର କରିଛି। ୪୮.୧୪ କୋଟି ଟଙ୍କାର ରାଜସ୍ୱ ବିଡିଏ ପାଣ୍ଠିକୁ ପଠାଯାଇଛି, ଯାହା ଆଇନଗତ ଭାବରେ ଭୁବନେଶ୍ୱରର ନାଗରିକ ସଂସ୍ଥା ବିଏମସିର ହେବା କଥା।
ଗତ ୮ ବର୍ଷ ମଧ୍ୟରେ ବିଡ଼ିଏ ଦ୍ୱାରା ଅନୁମୋଦିତ ଅନେକ ପ୍ରକଳ୍ପର ବୈଧତା ଉପରେ ବାସିନ୍ଦାମାନେ ପ୍ରଶ୍ନ ଉଠାଇଛନ୍ତି। ଅପରପକ୍ଷେ ପ୍ଲାନ୍ ଅନୁମୋଦନ ଜନିତ ତ୍ରୁଟି ପାଇଁ ସହରରେ ଅବାଧ ଗୃହ ନିର୍ମାଣ ବଢୁଛି ଓ ଜଳବନ୍ଦୀ ସମସ୍ୟା ସୃଷ୍ଟି ହେଉଛି।
