ପହଲଗାମରେ ଭାରତୀୟ ପର୍ଯ୍ୟଟକଙ୍କୁ ଆତଙ୍କବାଦୀ ମାରିବା ପରେ ଦୁଇ ଦେଶ ମଧ୍ୟରେ ସମ୍ପର୍କ ଅତି ତିକ୍ତତା ଆଡ଼କୁ ଗତି କରୁଛି। ପିଓକେ ଅଞ୍ଚଳରେ ପାକିସ୍ତାନ ଅସ୍ତ୍ର ବିରତି ଉଲ୍ଲଂଘନ କରିଛି।
ଘଟଣା ପରେ ପାକିସ୍ତାନକୁ ପାନେ ଦେବାକୁ ଭାରତ ପ୍ରସ୍ତୁତ ହେଉଥିବା ବେଳେ ପାକିସ୍ତାନ ଭୟଭୀତ ହୋଇ ପଡ଼ିଛି। ଭାରତ ଧର୍ମପୀଠ ଓ ମଦ୍ରାସାକୁ ଟାର୍ଗେଟ କରିବାର ଆଶଙ୍କା କରି ପିଓକେ ଅଞ୍ଚଳରେ ଏକ ହଜାର ମଦ୍ରାସା ବନ୍ଦ କରି ଦେଇଛି ପାକିସ୍ତାନ। ସେହିଭଳି ଆଗାମୀ ଦଶ ଦିନ ପାଇଁ ବିଭିନ୍ନ ଧାର୍ମିକ କାର୍ଯ୍ୟକ୍ରମ ନ କରିବା ପାଇଁ ନିର୍ଦ୍ଦେଶ ଦିଆଯାଇଛି।
ପିଓକେର ନାଗରିକମାନଙ୍କୁ ଦୀର୍ଘ ସମୟ ପାଇଁ ଖାଦ୍ୟ ଶସ୍ୟ ସଂରକ୍ଷଣ କରି ରଖିବାକୁ ନିର୍ଦ୍ଦେଶ ଦିଆଯାଇଛି । ଯାହା ଦ୍ଵାରା ଯଦି ଯୁଦ୍ଧ ହୁଏ ସେଠାକାର ନାଗରିକମାନଙ୍କୁ ଖାଦ୍ୟ ଏବଂ ପାଣିର ଅଭାବ ସାମ୍ନା କରିବାକୁ ପଡିବ ନାହିଁ।
ପ୍ରକାଶ ଥାଉ କି ଭାରତ ପକ୍ଷରୁ ମଧ୍ୟ ପାକିସ୍ତାନ ସହ ବାଣିଜ୍ୟ କାରବାର ବନ୍ଦ ପାଇଁ ଭାରତୀୟ ବାଣିଜ୍ୟ ମହା ନିର୍ଦ୍ଦେଶାଳୟ ପକ୍ଷରୁ ବିଜ୍ଞପ୍ତି ଜାରି କରା ଯାଇଛି। ଅର୍ଥାତ ଭାରତ ପାକିସ୍ତାନ ମଧ୍ୟରେ ଆମଦାନୀ ରପ୍ତାନି ବନ୍ଦ୍ ରହିବ।
