ହୋମଗାର୍ଡକୁ ପ୍ରେମ ଓ ପ୍ରତାରଣା କରିବା ଅଭିଯୋଗରେ ଗିରଫ ହୋଇଥିବା କୁଜଙ୍ଗ ଥାନା ଇନ୍ସିପେକ୍ଟର ତପନ ନାହାକଙ୍କ ସମେତ ଜଣେ ଅତିରିକ୍ତ ଏସ୍‌ପିଙ୍କ ନାଁରେ ସାଂଘାତିକ ଅଭିଯୋଗ ଆଣିଛନ୍ତି ପୀଡ଼ିତା ହୋମଗାର୍ଡ।

ସେ କହିଛନ୍ତି ଯେ, ଇନ୍ସିପେକ୍ଟର ଯେତେବେଳେ ଏଏସ୍‌ଆଇ ଥିଲେ ସେବେଠାରୁ ତାଙ୍କୁ ବିବାହର ପ୍ରତିଶ୍ରୁତି ଦେଇ ତାଙ୍କ ସହ ଶାରୀରିକ ସମ୍ପର୍କ ରଖିଥିଲେ। ସେ ଇନ୍ସିପେକ୍ଟର ହେବା ପରେ ତାଙ୍କ ସହ କୌଣସି ସମ୍ପର୍କ ରଖୁ ନ ଥିଲେ। ଯେଉଁଥିପାଇଁ ସେ ଥାନାରେ ଅଭିଯୋଗ କରିଥିଲେ। ମାମଲାରେ ଇନ୍ସିପେକ୍ଟର ଗିରଫ ହୋଇଥିବା ବେଳେ ତାଙ୍କୁ ଚାକିରିରୁ ବହିଷ୍କାର କରାଯାଇଛି। କିନ୍ତୁ ପୀଡ଼ିତା ହୋମଗାର୍ଡ ଏବେ ଜଣେ ଅତିରିକ୍ତ ଏସ୍‌ପିଙ୍କ ଆଡକୁ ଅଙ୍ଗୁଳି ନିର୍ଦ୍ଦେଶ କରିଛନ୍ତି। ସେ କହିଛନ୍ତି ଯେ, ସେ ଯେତେବେଳେ ଇନ୍ସିପେକ୍ଟରଙ୍କ ନାଁରେ ଅଭିଯୋଗ କଲେ ମାମଲା ପ୍ରତ୍ୟାହାର ପାଇଁ ଏସ୍‌ପି ତାଙ୍କ ଉପରେ ଚାପ ପକାଉଥିଲେ। ଏମିତି କି ୨୫ ଲକ୍ଷ ଟଙ୍କା ଦେବାର ପ୍ରଲୋଭନ ମଧ୍ୟ ଦେଖାଇବା ସହ ଚାକିରୀରୁ ନିଲମ୍ବନ କରିବାର ଧମକ୍‌ ଦେଇଥିଲେ ବୋଲି କହିଛନ୍ତି ପୀଡ଼ିତା ହୋମଗାର୍ଡ।

ତେବେ ସେ ସିଧା ସଳଖ ନ କହି ଜଣେ କନ୍‌ଷ୍ଟେବଳ ମାଧ୍ୟମରେ କହିଥିଲେ ବୋଲି ପୀଡ଼ିତା କହିଛନ୍ତି। ଏମିତି କି ଏକ ଅଜଣା ନମ୍ବରରୁ ତାଙ୍କ ବାପା ମାଆଙ୍କୁ ଧମକ୍‌ ଦିଆଯାଉଥିବା ଅଭିଯୋଗ କରିଛନ୍ତି ହୋମଗାର୍ଡ। ଏମିତି କି ତାଙ୍କ ଜୀବନ ପ୍ରତି ବିପଦ ଥିବାରୁ ସେ ଗଣମାଧ୍ୟମ ମାଧ୍ୟମରେ ସୁରକ୍ଷା ଲୋଡ଼ିଛନ୍ତି। ଅପରପକ୍ଷେ ହୋମଗାର୍ଡଙ୍କ ଏଭଳି ଅଭିଯୋଗକୁ ଖଣ୍ଡନ କରିଛନ୍ତି ଜଗତସିଂହପୁର ଏସ୍‌ପି ଭବାନୀ ଶଙ୍କର ଉଦ୍‌ଗାତା। ସେ କହିଛନ୍ତି ଯେ, ହୋମଗାର୍ଡ ଯାହାସବୁ ଅଭିଯୋଗ ଆଣିଛନ୍ତି ତା’ର କିଛି ପ୍ରମାଣ ଅଛି କି। ଏମିତି କି ଭେଟିବାକୁ ଯିବାର କୌଣସି ବ୍ୟକ୍ତି ଦେଖିଥିବାର କିମ୍ବା ପ୍ରମାଣ ଥିଲେ ଦିଅନ୍ତୁ। ତେଣୁ ହୋମଗାର୍ଡ ଯାହାସବୁ କହୁଛନ୍ତି ତାହା ମିଛ ବୋଲି କହିଛନ୍ତି ଏସ୍‌ପି ଶ୍ରୀ ଉଦ୍‌ଗାତା।