ଆମେରିକାରେ ଜଣେ ଭାରତୀୟ ଛାତ୍ରଙ୍କୁ ଗୁଳିକରି ହତ୍ୟା କରାଯାଇଛି। ମୃତକ ହେଲେ ତେଲେଙ୍ଗାନା ୨୭ ବର୍ଷୀୟ ଛାତ୍ର ପ୍ରବୀଣ କୁମାର ଗମ୍ପା। ସେ ୱିସ୍କନସିନ୍-ମିଲୱାକି ବିଶ୍ୱବିଦ୍ୟାଳୟରେ ଡାଟା ସାଇନ୍ସରେ ମାଷ୍ଟର ଡିଗ୍ରୀ ଅଧ୍ୟୟନ କରୁଥିଲେ।
ବୁଧବାର ୱିସ୍କନସିନରେ ଏକ ସନ୍ଦିଗ୍ଧ ଡକାୟତି ଉଦ୍ୟମରେ ପ୍ରବୀଣ କୁମାରଙ୍କୁ ଗୁଳିକରି ହତ୍ୟା କରାଯାଇଥିବା କୁହାଯାଉଛି। ଖବର ନେବାରୁ ଜଣାପଡ଼ିଛି ଯେ, ପ୍ରବୀଣ କୁମାର ଯେଉଁଠାରେ ରହୁଥିଲେ ନିକଟରେ ଅଜ୍ଞାତ ଆକ୍ରମଣକାରୀମାନେ ଗୁଳି ଚଳାଇଥିଲେ। ଯେଉଁଥିରେ ତାଙ୍କର ମୃତ୍ୟୁ ଘଟିଥିବା କୁହାଯାଉଛି। ପ୍ରବୀଣ କୁମାରଙ୍କ ବାପା ରାଘୁବୁଲ କହିଛନ୍ତି ଯେ ବୁଧବାର ସକାଳେ ସେ ତାଙ୍କ ପୁଅଠାରୁ ଏକ ହ୍ୱାଟ୍ସଆପ୍ କଲ୍ ପାଇଥିଲେ କିନ୍ତୁ ତାହା ମିସ୍ କରିଦେଇଥିଲେ। ଯେତେବେଳେ ରାଘୁବୁଲ ଫୋନ୍ କଲେ, ଜଣେ ଅଜଣା ବ୍ୟକ୍ତି ତାଙ୍କ ପୁଅର ଫୋନ୍ ପାଇଥିବା ଦାବି କରି ଉତ୍ତର ଦେଲେ। ପରିବାରଙ୍କ ମନରେ ସନ୍ଦେହ କରିଥିଲେ। ପରେ ସତ୍ୟାସତ୍ୟ ଜାଣିବାକୁ ପାଇଥିଲେ।
କିଛି ବନ୍ଧୁ କହିଛନ୍ତି ଯେ ପ୍ରବୀଣ କୁମାର ଗୁଳିବିଦ୍ଧ ମୃତଦେହ ମିଳିଛି। କିଛି ଲୋକ କହିଛନ୍ତି ଯେ ତାଙ୍କୁ ଏକ ଦୋକାନରେ ଗୁଳି କରି ହତ୍ୟା କରାଯାଇଥିଲା। ପରିବାର ଏପର୍ଯ୍ୟନ୍ତ ପ୍ରକୃତରେ କ’ଣ ଘଟିଥିଲା ତାହା ଜାଣିପାରି ନାହାନ୍ତି।
ପ୍ରବୀଣ କୁମାରଙ୍କ ମୃତ୍ୟୁରେ ଚିକାଗୋସ୍ଥିତ ଭାରତୀୟ କନସୁଲେଟ୍ ଜେନେରାଲ ଶୋକ ପ୍ରକାଶ କରିଛନ୍ତି। “ୱିସ୍କନସିନ୍-ମିଲୱାକି ବିଶ୍ୱବିଦ୍ୟାଳୟର ସ୍ନାତକୋତ୍ତର ଛାତ୍ର ପ୍ରବୀଣ କୁମାରଙ୍କ ଅକାଳ ବିୟୋଗରେ ଶୋକ ପ୍ରକାଶ କରିଛନ୍ତି।
କନସୁଲେଟ୍ ପ୍ରବୀଣଙ୍କ ପରିବାର ଏବଂ ବିଶ୍ୱବିଦ୍ୟାଳୟ ସହିତ ଯୋଗାଯୋଗରେ ଅଛି, ସେମାନଙ୍କୁ ସମସ୍ତ ପ୍ରକାରର ସମର୍ଥନରେ ସାହାଯ୍ୟ କରୁଛି। ଆମର ଆନ୍ତରିକ ସମବେଦନା ଏବଂ ପ୍ରାର୍ଥନା ତାଙ୍କ ପରିବାର ଏବଂ ଦିବଙ୍ଗତଙ୍କ ବନ୍ଧୁମାନଙ୍କ ସହିତ ଅଛି ବୋଲି ସେମାନେ ଏକ୍ସରେ ଏକ ପୋଷ୍ଟ କରି ଜଣାଇଛନ୍ତି।
