ମେଲବର୍ଣ୍ଣ ଟେଷ୍ଟରେ ଟିମ୍ ଇଣ୍ଡିଆର ପରାଜୟ ପରେ ଏକ ବଡ଼ ଖବର ସାମ୍ନାକୁ ଆସୁଛି । ମିଡିଆ ରିପୋର୍ଟ ଅନୁଯାୟୀ ଟିମ୍ ଇଣ୍ଡିଆର ଅଧିନାୟକ ରୋହିତ ଶର୍ମା ଖୁବ ଶୀଘ୍ର ଟେଷ୍ଟ କ୍ରିକେଟରୁ ଅବସର ନେଇପାରନ୍ତି । ସିଡନୀ ଟେଷ୍ଟ ପରେ ରୋହିତ ଶର୍ମା ଅବସର ନେବେ ବୋଲି ମିଡିଆ ରିପୋର୍ଟରେ କୁହାଯାଉଛି । ସୂଚନା ଅନୁସାରେ ଜାନୁଆରୀ ୩ରୁ ସିଡନୀରେ ବର୍ଡର-ଗାଭାସ୍କର ଟ୍ରଫିର ଶେଷ ମ୍ୟାଚ୍ ଖେଳାଯିବ । ତେବେ ଏହି ଟେଷ୍ଟ ମ୍ୟାଚ୍ ରୋହିତ ଶର୍ମାଙ୍କ ରେଡ୍ ବଲରେ ଶେଷ ମ୍ୟାଚ୍ ବୋଲି କିଛି ମିଡିଆ ରିପୋର୍ଟରେ କୁହାଯାଇଛି ।
ଟାଇମ୍ସ ଅଫ୍ ଇଣ୍ଡିଆର ରିପୋର୍ଟ ଅନୁଯାୟୀ, ବିସିସିଆଇ ଏବଂ ଚୟନକର୍ତ୍ତା ରୋହିତ ଶର୍ମାଙ୍କ ଅବସର ନେଇ କଥାବାର୍ତ୍ତା ଆରମ୍ଭ କରିଛନ୍ତି। କିନ୍ତୁ ଟିମ୍ ଇଣ୍ଡିଆର ଅଧିନାୟକ ରୋହିତ ଶର୍ମା ଚୟନକର୍ତ୍ତାଙ୍କୁ ମନାଇବା ପାଇଁ ଚେଷ୍ଟା କରୁଛନ୍ତି । ରୋହିତ ଶର୍ମା ବାସ୍ତବରେ ବିଶ୍ୱ ଟେଷ୍ଟ ଚାମ୍ପିୟନଶିପ୍ର ଫାଇନାଲ ଖେଳିବାକୁ ଚାହାଁନ୍ତି, ଯଦି ଭାରତ WTC ଫାଇନାଲରେ ପହଞ୍ଚେ ତେବେ ସେହି ମ୍ୟାଚ୍ ତାଙ୍କର ଶେଷ ମ୍ୟାଚ୍ ହୋଇପାରେ । ତେବେ WTC ଫାଇନାଲ ଯିବା ପାଇଁ ଭାରତର ପାଖରେ ଏବେ ବହୁତ କମ୍ ସମ୍ଭାବନା ରହିଛି । ଏଭଳି ପରିସ୍ଥିତିରେ ସିଡନୀ ରୋହିତଙ୍କ ଶେଷ ଟେଷ୍ଟ ମ୍ୟାଚ୍ ହୋଇପାରେ ।
ବଡ କଥା ହେଉଛି ମେଲବର୍ଣ୍ଣ ଟେଷ୍ଟରେ ପରାଜୟ ପରେ ରୋହିତ ଶର୍ମାଙ୍କ ଉପରେ ଏହି ରିପୋର୍ଟ ତୁରନ୍ତ ଆସିଛି। ମେଲବର୍ଣ୍ଣ ଟେଷ୍ଟରେ ଟିମ୍ ଇଣ୍ଡିଆ ୧୮୪ ରନରେ ହାରିଛି। ଏକ ସମୟ ଥିଲା ଯେତେବେଳେ ଟିମ୍ ଇଣ୍ଡିଆ ଏହି ଟେଷ୍ଟକୁ ଡ୍ର’ କରିପାରେ ବୋଲି ଜଣାପଡ଼ୁଥିଲା । ଟି ’ବ୍ରେକ୍ ପର୍ଯ୍ୟନ୍ତ ଟିମ୍ ଇଣ୍ଡିଆର ମାତ୍ର ୩ଟି ଓ୍ବିକେଟ ଯାଇଥିଲା । କିନ୍ତୁ ଏହା ପରେ ପନ୍ତ ଏକ ଖରାପ ସଟ୍ ଖେଳି ଆଉଟ୍ ହୋଇଥିଲେ ଏବଂ ପରେ ଭାରତୀୟ ଇନିଂସ କାର୍ଡ ଘର ପରି ଭୁଶୁଡି ପଡିଥିଲା ।
ଯଦି ରୋହିତ ଶର୍ମାଙ୍କ କଥା କହିବା ତାହାଲେ, ଚଳିତ ଅଷ୍ଟ୍ରେଲିଆ ସିରିଜ୍ ରୋହିତଙ୍କ ପାଇଁ ଖରାପ ରହିଛି । ସେ ଏହି ସିରିଜର ୩ଟି ମ୍ୟାଚରେ ମାତ୍ର ୩୧ ରନ୍ ସ୍କୋର କରିବାରେ ସକ୍ଷମ ହୋଇଛନ୍ତି । ରୋହିତଙ୍କ ବ୍ୟାଟିଂ ହାରାହାରି ହେଉଛି ୬.୨୦ । ଯାହା ଅତନ୍ତ୍ୟ ନୈରାଶଜନକ । ମେଲବର୍ଣ୍ଣ ଟେଷ୍ଟରେ ତାଙ୍କର ଗୋଟିଏ ନିଷ୍ପତ୍ତି ଟିମ୍ ଇଣ୍ଡିଆ ଉପରେ ଅଧିକ ଭାରି ପଡ଼ିଥିଲା । ଦମଦାର ଫର୍ମରେ ଥିବା ରାହୁଲଙ୍କୁ ଓପନିଂରୁ ହଟାଇ ସେ ଓପନିଂ କରିଥିଲେ । କିନ୍ତୁ ନା ରୋହିତ ସ୍କୋର କରିଥିଲେ ନା କେ.ଏଲ୍ ରାହୁଲ ରନ୍ ସ୍କୋର କରିପାରିଥିଲେ । ତିନି ନମ୍ବରରେ ଖେଳି କେଏଲ ରାହୁଲ ଉଭୟ ଇନିଂସରେ ବିଫଳ ହୋଇଥିଲେ । ରୋହିତ ଶର୍ମାଙ୍କ ବ୍ୟାଟିଂକୁ ଦେଖିଲେ ଲାଗୁଛି ଯେ ଟେଷ୍ଟ କ୍ରିକେଟରେ ତାଙ୍କୁ ଅଧିକ ସମୟ ବାକି ନାହିଁ। ସେଥିପାଇଁ ଖୁବଶୀଘ୍ର ସେ ଅବସର ନେବେ ବୋଲି ଖବର ସାମ୍ନାକୁ ଆସୁଛି ।