ଉତ୍ତରପ୍ରଦେଶର ବାଗପାଟରେ ଏକ ଧାର୍ମିକ କାର୍ଯ୍ୟକ୍ରମ ପାଇଁ ନିର୍ମିତ ବାଉଁଶ ପ୍ଲାଟଫର୍ମ ଭୁଶୁଡ଼ି ପଡ଼ିବାରୁ ୬ ଜଣଙ୍କର ମୃତ୍ୟୁ ହୋଇଥିବା ବେଳେ ୫୦ରୁ ଅଧିକ ଲୋକ ଆହତ ହୋଇଛନ୍ତି।

ମିଳିଥିବା ସୂଚନାନୁସାରେ, ବାରୁତର ଜୈନ୍ ସମ୍ପ୍ରଦାୟ ପକ୍ଷରୁ ‘ଲଡୁ ମହୋତ୍ସବ’ ଆୟୋଜନ କରାଯାଇଥିଲା। ​​ ଲଡୁ ଅର୍ପଣ କରିବା ପାଇଁ ଶହ ଶହ ଲୋକ ଏକ ମନ୍ଦିରରେ ପହଞ୍ଚିଥିଲେ। ଭକ୍ତମାନଙ୍କ ପାଇଁ ଏକ ବାଉଁଶ ପ୍ଲାଟଫର୍ମ ନିର୍ମାଣ କରାଯାଇଥିଲା। ଏହି ପ୍ଲାଟଫର୍ମ ଲୋକଙ୍କ ଓଜନ ତଳେ ଭୁଶୁଡି ପଡିଲା।
ବାଗପାଟ ପୋଲିସ ଏବଂ ଆମ୍ବୁଲାନ୍ସ ଘଟଣାସ୍ଥଳରେ ପହଞ୍ଚି ଆହତମାନଙ୍କୁ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରିଥିଲେ। ଯେଉଁମାନଙ୍କର ସାମାନ୍ୟ କ୍ଷତ ଅଛି ସେମାନଙ୍କୁ ପ୍ରାଥମିକ ଚିକିତ୍ସା କରାଯାଇ ଘରକୁ ପଠାଯାଇଥିବାବେଳେ ଗୁରୁତର ଆହତ ଅନ୍ୟମାନଙ୍କୁ ଚିକିତ୍ସା କରାଯାଉଛି।

ଜିଲ୍ଲା ମାଜିଷ୍ଟ୍ରେଟ୍ ଅସ୍ମିତା ଲାଲ କହିଛନ୍ତି ଯେ ଜୈନ ସମ୍ପ୍ରଦାୟ ପକ୍ଷରୁ ଗତ ୩୦ ବର୍ଷ ଧରି ପ୍ରତିବର୍ଷ ‘ଲଡୁ ମହୋତ୍ସବ’ ପାଳନ କରାଯାଉଛି।

ଜୈନ ଦେବତା ଆଦିନଥାଙ୍କ ନିର୍ବାଣକୁ ପାଳନ କରିବା ପାଇଁ ପ୍ରତିବର୍ଷ ଏହି ପ୍ଲାଟଫର୍ମ ନିର୍ମାଣ କରାଯାଇଥାଏ। ପୁରୋହିତମାନେ ଲଡୁ ଅର୍ପଣ କରିବାକୁ ଯାଇଥିଲେ ଏବଂ ଏଥିରେ ଶହ ଶହ ଭକ୍ତଙ୍କ ସହ ପ୍ଲାଟଫର୍ମ ଭୁଶୁଡି ପଡିଥିଲା।

ଏହି ଘଟଣାରେ ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଦୁଃଖ ପ୍ରକାଶ କରିବା ସହ ଅଧିକାରୀମାନଙ୍କୁ ଘଟଣାସ୍ଥଳରେ ପହଞ୍ଚିବା ସହ ରିଲିଫ କାର୍ଯ୍ୟକୁ ତ୍ୱରାନ୍ୱିତ କରିବାକୁ କହିଛନ୍ତି। ତାଙ୍କ କାର୍ଯ୍ୟାଳୟ ପକ୍ଷରୁ କୁହାଯାଇଛି ଯେ ଆହତଙ୍କ ଶୀଘ୍ର ଆରୋଗ୍ୟ ପାଇଁ ମୁଖ୍ୟମନ୍ତ୍ରୀ ପ୍ରାର୍ଥନା କରିଛନ୍ତି।