୫ ହଜାର ଟଙ୍କା ଲାଞ୍ଚ ନେଲା ବେଳେ ଭିଜିଲାନ୍ସ ହାତରେ ଧରା ପଡିଛନ୍ତି ନବରଙ୍ଗପୁର ଜିଲ୍ଲା ଉମରକୋଟ ସହକାରୀ କୃଷି ଅଧିକାରୀଙ୍କ କାର୍ଯ୍ୟାଳୟର ଅନ୍ୟଜଣେ କର୍ମଚାରୀ। ସେମାନେ ହେଲେ ସହକାରୀ କୃଷି ଅଧିକାରୀ ନୀଳକଣ୍ଠ ପରିଡ଼ା ଓ ବ୍ଲକ୍ ବୈଷୟିକ ପରିଚାଳକ ସୁରେନ୍ଦ୍ର ସିଂବୁନ୍ଦେଲା।
ଜଳନିଧି ଯୋଜନାରେ ଜଣେ ଚାଷୀଙ୍କ ଠାରୁ ବୋରୱେଲ ଖନନ ବାବଦରେ ସବସିଡି କରାଇଦେବା ପାଇଁ ଟଙ୍କା ନେବା ପାଇଁ ପୂର୍ବରୁ କଥା ହୋଇଥିଲେ। ଚାଷୀ ଜଣକ ଏ ନେଇ ଭିଜିଲାନ୍ସର ଦ୍ବାରସ୍ଥ ହୋଇଥିଲେ। ଭିଜିଲାନ୍ସ ଅଧିକାରୀଙ୍କ ପରାମର୍ଶ ମୁତାବକ ଚାଷୀ ରଙ୍ଗବୋଳ ନୋଟ୍ ନେଇ ଦୁଇ କର୍ମଚାରୀଙ୍କୁ ଦେଇଥିଲେ। ଏହି ସମୟରେ ଯୋଜନା ବଦ୍ଧ ଭାବେ ଛକି ରହିଥିବା ଭିଜିଲାନ୍ସ ଅଧିକାରୀମାନେ ମାଡି ବସିଥିଲେ। ଭିଜିଲାନ୍ସ ପକ୍ଷରୁ ଦୁଇ କର୍ମଚାରୀଙ୍କ ଠାରୁ ୫ ହଜାର ଟଙ୍କା ଜବତ କରାଯାଇଛି। କୋରାପୁଟ ଭିଜିଲାନ୍ସରେ ଉଭୟଙ୍କ ନାଁରେ ଏକ ମାମଲା ରୁଜୁ କରାଯାଇ ତଦନ୍ତ କରାଯାଉଛି। ଉଭୟଙ୍କ ସମ୍ପତ୍ତି ନେଇ ଖୋଳତାଡ଼ କରୁଛି ଭିଜିଲାନ୍ସ।